太子站非法集結案 控方指14歲女被告向警署揮手挑釁 後撤回指控

更新時間 (HKT): 2021.04.23 17:19

前年9月底有人聚集於太子站外「悼念」8.31事件,警方拘捕多人。14歲少女與電影製片人等4人被控參與非法集結及管有攻擊性武器罪受審。少女自辯強調,涉案雷射筆由路人提供,她只是好奇試玩「無目標咁照」;惟控方不斷重複問她是否刻意射向警署,她終不耐煩謂「攞張截圖嚟話我特登瞄向警察,我同意唔到囉」。控方指她在警方警告及舉藍旗後,刻意向警署揮手,行為挑釁;少女解釋當時只是向朋友打招呼。少女作供完畢後情緒不穩,一度哭泣。

少女連續三日出庭自辯,控方指她當日在花旗銀行門口向警署照雷射光,少女重申只是「好奇咁玩,照天照地,無目標咁照」,並非射向警署。控方庭上播片指她三次舉起雷射筆射向警署,多次重複問少女是否刻意向警署方向射雷射筆,少女不堪控方多番重複問題,不耐煩地說,「主控官,我唔知我會照到咩囉。你一路執住呢一點,攞張截圖嚟話我特登瞄向警察,我同意唔到囉,唔好意思呀主控官。」

否認向警署射鐳射光 不滿控方將他人行為歸咎自己

控方繼續播片,指少女當時正使用雷射筆,並謂現場有人講粗口、有車輛長響咹。少女稱「咁多人大嗌,我冇留意」,又謂「佢哋講粗口關我咩事?我唔明你將現場啲聲音放係我身上做咩?我得15歲咋,我無駕車嘅習慣。」控方指少女在現場使用雷射筆,作出擾亂秩序的行為,引致現場人士講粗口、起哄及響號,少女不同意。

控方續指,警方當時用白燈照向少女,「淨係照住你,當時附近得你一個用雷射筆,你係知道警方係照住你、你係警方嘅目標。」少女稱身旁有其他人,「我唔明你問嚟做咩」;裁判官陳慧敏開腔稱:「主控,其實都有相,唔使問啦?」

控方指少女當時持續向警署射雷射光,曾三次垂低手關掉雷射筆、再舉手再射,少女重申「支筆唔係我,我都唔知個開關喺邊」;並謂「我唔係想打斷你,但你尋日已經問咗好耐,我都解釋過好多次,我真係冇射阿sir。如果係,鏡頭就影到我射實佢啦?我唔知幾時可以答啲我未答過嘅問題,唔好意思呀主控官。」

控方指少女向警揮手屬挑釁 後撤回指控

控方又指,片段拍到在警方發出警告後,少女坐在花旗銀行外向警署揮手,少女不同意。裁判官陳慧敏要求播片,質疑控方稱:「佢揮手同距離警告,已經隔咗兩分鐘啦喎。」主控聞言不再追問,少女其後澄清當時是向友人打招呼。

主控其後再播片,指當少女橫過太子道西馬路時,突然轉身跳起,並向警署舉高雙手揮手;而當時警方正舉起藍旗,認為少女是故意向住藍旗跳起揮手,行為擾亂秩序、侮辱及挑釁警員。少女回應「我媽咪不嬲都教我,過馬路要舉手俾司機睇,唔係會車到我。我覺得你係話我挑釁警察,我唔會同意。」

控方於午休後申請撤回早前指控少女向警署揮手,行為挑撥的說法,因當時並非控罪所指控的案發時間之內。少女完成作供,案件押後至5月10日結案陳詞。

本案被告為學生蔡詠豪(19歲)、製片人廖穗敏(30歲)、14歲少女及工程師霍徳龍(31歲)。首三被告被控於去年9月24日至25日參與非法集結。三名成年被告各自被控管有攻擊性武器,蔡和霍涉管有雷射筆,廖則被控管有雷射筆及萬用刀。蔡詠豪在開審中途認罪,下月12日判刑。

【案件編號:WKCC1312/20】

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

一格照片,一個故事,Follow蘋果Instagram!
BannerBanner