專訪︱一夫當關 壓力爆炸 民陣陳皓桓堅持留守:政權要打壓你嘅時候,你避都無得避㗎啦!

更新時間 (HKT): 2021.04.25 00:14

難以掌握紅線的《國安法》下,一篇無事實基礎的外媒報道令成立近20年的民間人權陣線飽受衝擊,多個團體和秘書處職員憂誤觸「紅線」,先後宣佈停止參與和退出民陣工作。現於民陣「一夫當關」的陳皓桓坦言早前曾因此「壓力爆炸」,一度反思應否退出民陣,最終自覺在社運人士中「包袱最少」,決定留守。身負多宗案件的他稱,預計6月或會首度入獄,稍後會與仍留在民陣的組織商討未來方向,包括是否需要暫停運作。他稱,在極權政府下爭取民主自由,坐監或一如古思堯所言,「可能真係要成為我哋生活一部份」,指港人能做的就是在監獄外繼續堅持,「盡力捐窿捐罅都要發聲」。

記者:林俊謙

25歲的陳皓桓去年10月從社民連黨友岑子杰手中接過民陣召集人一職,孭起這個香港民主運動上最大的民主派政黨和民間組織聯合平台。政府2月底以《國安法》大搜捕47名參加和組織去年民主派初選的人士後,新加坡《聯合早報》突引述不具名消息,聲稱民陣因曾接受美國國家民主基金會(NED)資助舉辦反修例運動,短期內將遭港府以《國安法》取締。

陳皓桓接受《蘋果》訪問時憶述,當日看上述報道時未感任何壓力,「因為佢哋講嘅全部都係假嘅,話我哋有收NED錢,但我哋完全無收過,完全係老屈」,指民陣過去一直靠在遊行集會中的香港市民捐款支撐日常營運,從無收取任何外國資金。

他指,原以為發出聲明澄清後,即能平息流言,想不到民主派47人因初選被捕,「飄移的紅線」令多個民主派政黨和民間組織均擔心誤觸「紅線」而停止參與民陣工作,「民間團體真係承受唔到《國安法》壓力,政黨亦要諗將來發展」。至於作為民陣領導層的秘書處,原副召集人何啟明、司庫柯耀林因初選案被捕,另一副召集人葉錦龍則因希望履行區議員職務,先後請辭,令民陣秘書處現僅餘陳皓桓「一夫當關」,他對退出的戰友和團體表示理解。他將在5月與仍在民陣的團體開會,若無人在他坐監期間接任民陣召集人,民陣就要暫停運作。

回想當時面對連串打擊,加上《文匯報》、《大公報》等中共喉舌連日刊文追擊,陳皓桓坦言壓力之大連他亦「有啲頂唔到」,「因為我每一日都喺度聽到,話每一日都要拉我違反《國安法》,咁我咪即係得返嗰幾日、嗰一兩個禮拜時間?再加上我有日返到屋企,發現我隻狗死咗,我決定休息一個禮拜」。他透露小休期間曾反思自己的未來,包括是否要退出民陣,「但我又覺得,而家我25歲,我畀盡你10年時間(坐監),我都係35歲,然後再夾埋,你一個冇乜包袱嘅人,你都唔頂,咁你叫邊個頂?你叫啲有包袱嘅人去頂?」,認為當下只能盡力去做,「我難得喺呢個時代,企喺呢個崗位,我就要堅持大家堅持做嘅嘢,做我自己盡力可以做嘅嘢,然後做到最盡時,我就去坐監」。

認同李卓人所指 民主派即使「委曲」亦難「求全」

他認同李卓人所講,從多宗民主派遭濫捕濫告的案件中,看到民主派即使「委曲」,亦未見可以「求全」,「政權要打壓你嘅時候,你避都無得避㗎啦!你能夠做嘅,就係唔好俾恐懼支配自己;你能夠做嘅,就係克服呢個恐懼,我唔係話叫你完全冇恐懼,而係你要克服、面對個恐懼,兼且要面對埋你要面對嘅嘢,因為我哋無做錯吖嘛!我哋爭取五大訴求有乜問題?爭取結社、言論自由有乜問題?《基本法》27條寫明㗎喎!」

受訪當日,陳皓桓一早到法院外聲援被控非法集結罪的古思堯,最終出獄不久的古被判罪成再入獄。陳坦言,本來不太認同古指「坐監要成為我哋生活一部份」的說法,「但當你喺一個極權政府之下,你要爭取民主自由,你要令到香港社會變得更加好嘅時候,坐監可能真係要成為我哋生活一部份囉,我哋唔單止要習慣,仲要知道,我哋嚟緊只會不停咁入獄,唔同嘅人都不停入獄,然後我哋唔單止克服佢,仲要繼續支持入面嘅手足」。

冀港人未來繼續「捐窿捐罅」發聲

那今年還有否民陣歷年都舉行的七一遊行?陳皓桓苦笑說,該問題就如今年是否還有香港電影金像獎一樣,目前答案是「唔知道」,認為最終要取決於香港市民,因為屆時他很可能已在獄中,今年七一亦適逢是中共建黨100周年,「香港市民仲發唔發聲呢?呢個要香港市民自己決定,因為大家都清楚知道,民陣再發起係非常困難,我喺度嘅話,我會嘗試(申辦七一遊行),但係我(屆時)未必喺度,我好希望唔會完全無聲音,喺七一見到大家可以大聲地要求內地中央政府,畀返民主自由香港人,畀返應有的權利,履行返佢哋嘅承諾,我覺得香港人要做呢樣嘢」。

面對政權連番打壓,他稱留意到香港人一直盡力「捐窿捐罅」發聲,包括排隊旁聽民主派被捕案、排隊光顧遭海關檢控的阿布泰等,「咁嚟緊六四、七一,我好希望大家都可以盡力去做」,認為對至今被還押和在囚的手足而言,香港人堅持發聲,就是最重要的力量來源,寄語港人未來最重要「見字飲水,強身健體」,更要反思整場「反送中」運動中,有甚麼事值得學習和改善,並在支援在囚手足方面「盡做」,「每人行多一步,咁個社會就會進步好多」。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner