隔牆有耳:日攝影師相展 撐港在囚手足(李八方)

更新時間 (HKT): 2021.04.26 02:00
■中村康伸攝影展海報用上周庭及黃國桐嘅大頭相,非常搶眼。

當權者成日話香港已經由亂入治,而反修例運動入面嘅抗爭者亦被指危害國家安全,不過官方有官方說法,民間同樣有唔同嘅人,用佢哋嘅眼光去講呢段歷史,包括唔少喺呢段時間喺香港嘅外國記者,想幫香港人保存呢段歷史。其中一位名叫中村康伸嘅日本攝影師,最近喺日本開咗個攝影展,用照片記錄一班在囚嘅民主人士,並且聲援香港在囚嘅手足。

受熱情感動成「港人俘虜」

呢個叫「香港民主人士」嘅攝影展,現正喺橫濱市唐人街AAA ANNEX GALLERY舉行,展出嘅照片數量約80張,包括約35名民主派人士同抗爭者。其實中村康伸初次嚟香港影抗爭,已經係2014年傘運時,當年中村應學生時代同一名電影界朋友強烈邀請,嚟香港睇佔中運動,結果因為感受到抗爭者嘅熱情而成為「香港人嘅俘虜」,仲將拍到嘅相喺新宿舉行咗一次攝影展。反修例運動期間,佢亦都有落場拍攝,戴過防毒面具,亦食過催淚彈,佢上年3月時就曾經同樣喺橫濱一個畫廊,舉行名為「雨傘運動至今5.5年」嘅相展,今次可以話係再接再厲,希望令大家繼續關注香港人爭取民主自由嘅情況。

今次中村康伸嘅攝影展,展期去到呢個月底,期間仲會舉行一場演講會,邀請咗一位喺香港長大嘅自由作家,令日本人可以更立體咁知道香港人面對嘅處境。

李八方

一格照片,一個故事,Follow蘋果Instagram!
BannerBanner