14歲自閉童康橋之家墮樓亡 母明知職員體罰卻不敢聲張 「報警去邊度住呢?」

更新時間 (HKT): 2021.04.27 17:09
事發於葵涌康橋之家。

14歲男童自閉男童疑從葵涌寄宿私人院舍「康橋之家」墮樓身亡,死因庭續研訊。男童母親在盤問下披露更多兒子生前疑遭院舍職員毆打細節,指院舍職員曾揚言,若兒子「亂咁畫」便會打兒子手板,她當時聽見後感到「好嬲」,但不敢得失職員,擔心「咪打多啲,睇唔到嘅」,亦不敢報警,「報警去邊度住呢?」死因裁判官黃偉權問,既然她自兒子確診自閉症起便一直在家照顧他,為何要在兒子13歲時送他到院舍;死者母親欲言又止,僅稱:「照顧唔到,佢同爸爸有衝突。」

男童梁子駿(14歲)於2016年8月23日被發現疑從葵涌禾塘咀街109至115號萬成大廈3字樓「康橋之家」墮下身亡。

男童母親江月梅作供,接受代表大狀陳偉彥查問,自言若她有能力照顧,一定希望由她親自照顧兒子,因住院舍會「擔心住得好唔好呀,有冇畀水飲,有冇畀飯食呀」。惟因兒子年紀漸長,力量越來越大,遂安排入住院舍。被問到為何替兒子的傷勢拍照,江解釋:「我影低佢,唔係啲人話我哋打佢。」

兒子多次表達不想返回院舍

江憶述指,2015年11月到院舍接兒子期間,八卦向鍾姑娘查問兒子乖不乖。鍾稱兒子「亂咁畫」,再犯便會打手板,江自言當時聽到「好嬲」,卻不敢得失職員,擔心「咪打多啲,睇唔到嘅」。其實她當時心想「唔好咁對啲細路啦」。另外她亦不敢報警,「報警去邊度住呢?」

江透露,當年9月曾一度打算接兒子返家居住,並已安排社工家訪,惟因兒子返家後將毛巾丟落街,「爸爸話遲啲先返(屋企)」,最後無奈地將兒子送回院舍。

江稱以她理解,院舍一度人手不足,院友也要協助煮飯洗菜。她亦曾經目擊院舍司機李錦全從後推兒子。江透露兒子多次表達不想返回院舍,其中一次她帶兒子乘港鐵返院舍,「到葵興,佢唔肯呀,唔肯出站」;又有一次帶兒子覆診後返回院舍,其間過馬路時「過幾次喊到死,過唔到,拖返我轉頭」,其後更發脾氣踢其他人。

兒子與父親「有啲衝突,有啲嗌霎」

法官黃偉權指,死者自出世及至確診自閉症以來,一直在家生活,而江則是家庭主婦,為何在兒子13歲時要送他到院舍。江起初解釋:「因為大個咗,照顧唔到。」黃官問:「有咩困難?」江回應謂:「坐唔定。」但後來她又稱:「其實唔係時時都郁來郁去。」最後她才表示:「佢同爸爸有衝突。」黃官追問細節,江僅稱:「有啲衝突,有啲嗌霎。」

江透露自兒子確診後,一直有社工跟進,起初欲替兒子申請入住寄宿學校,但「睇電視話對佢唔好,所以唔捨得」。直至兩年後欲提出申請時,教育局職員卻指「冇資格,你唔係單親」。黃官又問她為何不在寓所附近找學校或院舍以方便照顧,江稱附近沒有殘疾學校,並嘆謂:「呢啲咁嘅細路仔,邊度肯收?」

黃官又問江有否參與一些學習應對自閉症兒童的課程,江透露曾到筲箕灣家長資源中心聽講座,「但返到嚟爸爸唔鍾意,要湊住佢(兒子)」,其後便沒再參與。

【案件編號:CCDI474/16】

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

一格照片,一個故事,Follow蘋果Instagram!
BannerBanner