疫苗氣泡︱多間黃店拒就範 轟港府綑綁生意谷針:唔會為多30%生意要員工搵命博

更新時間 (HKT): 2021.04.27 22:50

食物及衞生局局長陳肇始今日(27日)下午公佈,以疫苗氣泡為基礎下將食肆分為A、B、C、D共4級。獲「放寬」的C和D級別食肆,堂食可分別延長至晚上12時和午夜2時,每枱人數分別放寬至6和8人,惟員工須接種一劑或兩劑疫苗,顧客亦須強制使用安心出行。有餐廳指,不可能為了多做數小時生意要員工「搵命博」,認為在疫情緩和下仍不斷增加食肆營業要求完全不合理。有食肆負責人認為,打針屬個人選擇,加上政府在多宗疫苗事故後均「推卸責任」,故不會強制員工打針,只會繼續營業至晚上10時。另有食肆認為,餐廳不能確保客人所持的疫苗二維碼是否屬實,變相令措施有名無實,做法多餘。

「不斷搵藉口收緊 又唔放寬限聚令」

黃店「開餐Dine Inn」老闆Eddy指,除非政府要求食肆一定要員工打疫苗和客人用安心出行才能營業,否則都不會參與,一來應用程式至今私隱問題成疑,二來放寬數小時對生意幫助不大,「開到12點就算,爭2、3成生意都好,我哋都唔會為咗2、3成生意去博……如果佢(政府)講到話食肆要開門就要所有員工打針、(客人)要安心出行,嗰啲叫做冇辦法囉,冇理由佢進一步你退十步」。

他又認為,不論是中國還是外國疫苗都面世不久,市民或員工都信心不足,市民也不會為了食飯「搵命博」,料政府主要是想放寬給酒樓等大型食肆舉辦宴會。他又指,以往疫情緩和已可放寬食肆人數,現時卻不斷增加要求,加重餐廳人手壓力和成本,「不斷搵藉口收緊又唔放寬限聚令,大家都知」,只能保持初心繼續捱下去。

「如果員工打完有咩事 點賠返個囡畀人」

「Joyful Dessert House」負責人高太指,政府現時明顯將食肆生意與打疫苗綑綁,希望提高疫苗接種率,質疑「每次都係飲食業第一批受害」。她指即使現時正值淡季,延長營業時間可挽回3、4成生意,也絕對不會參與計劃,「每個客人員工都有佢嘅自由,唔會叫員工為咗舖頭利益打針,自己身體唔好都冇打,如果(員工)打完有咩事,點賠返個囡畀人」。

高太又指,得悉附近有「藍店」員工知道有關消息亦感不滿,因他們年紀較大,擔心接種後不幸死亡,但不知道最終會否有員工被迫就範。她又指如未來沒有免費檢測,會資助員工檢測費用,希望捱至暑假較多年輕人外出,生意能轉好。

「冇可能為咗做多2個鐘 叫人搵命博」

「喜惶點心專門店」東主Jason同樣指不會參與計劃,「唔做到12點咪唔做到12點,冇可能為咗做多2個鐘叫人搵命博」,他認為坊間即使不是黃店也未必會參與,主要有較大誘因的應該是大型酒樓,因如員工打了兩針,宴會上限可增至100人。他又預計政府會維持舊有措施,不至於再加強規定只經營到晚上10時或2人一枱的餐廳。

對於政府未來或取消免費檢測,沒打疫苗的員工或需自費檢測,Jason指公司首3個月或可墊支或津貼,但長遠確實可能要員工自費承擔。

叙福樓黃傑龍:堅持唔逼員工打針

叙福樓集團主席黃傑龍坦言,對不宜打針的員工須醫生證明的安排感「頭赤」,需與員工詳細討論,「我上兩個星期講過唔可以逼員工打針,呢點係唔會變」,故其集團旗下食肆於4月29日維持4人一枱及營業至晚上10時,「要有足夠時間、同事商量,大家想唔想參加,先至知道有冇資格參加『疫苗氣泡』,如果好多同事唔想參加,咁我都冇資格參加。」

香港餐飲聯業協會會長黃家和指,政府已強調不接受員工只因自己喜好而不打針,被問到是否會辭退相關員工,黃僅指最好僱員與僱主能協商尋求方案,如員工能取得醫生證明不適合接種,他仍須接受每7日做檢測。

「食客會唔會為咗坐到凌晨2點 而冒呢個險?」

尖沙嘴甜品店主管馬先生指,自己曾與老闆商討,認為打針與否屬個人意願,故不會強迫員工打針,將會繼續堂食至晚上10時。

對於政府公佈的最新措施,他大嘆「嘥氣」,「如果你係想谷多啲人打針,就逼我哋啲食肆去打,你嘥氣啦!最匪夷所思嘅係,本身食肆嘅員工已經戴晒口罩,做晒措施,你仲要我哋去打針?」馬又怒斥,政府做法是矯枉過正,「不嬲都話病毒唔係夜晚先出嚟,如果要打,咁點解唔係你一入餐廳就要打針?」

馬指,對甜品店而言,能延長堂食時間的確有利,但由於現時太多食肆均只營業至晚上10時,人們減少外出用餐,令他們生意亦變差,每日生意額減少至少五成,「連外賣都冇乜,捱得幾耐得幾耐囉」。

馬認為,近日出現多宗疫苗事故,加上政府推卸責任的表現,成為市民對疫苗失去信心的主因,「有咁多宗事故,你又唔肯負責任,又話係去打針嗰個先有責任⋯⋯將心比己,我唔知自己有冇暗病,你又唔肯負應有嘅責任,咁我會揀唔打囉」。他亦批評,對食客而言,打疫苗的誘因亦不大,「捫心自問,我係食客,會唔會為咗凌晨2點仲可以坐低食嘢,而要冒呢個險去打支針?」

至於政府指,部份食肆可劃分區域,讓打針食客坐在該區域用膳。馬斥,政府措施只着眼於大財團的食肆,「我哋咁細間,點劃分個區域出嚟呀?再細啲根本冇可能做到」。

「可能清咗零都唔會放寬 因為要逼你打針」

拉麵店負責人黎先生指,由於本身店舖亦只營業至晚上10時,加上認為打疫苗屬員工個人意願,「所以我唔會理呢啲嘢」。

黎認為,現時根本沒有打針的誘因,自己亦未有打算接種,「而家個風險好大㗎喎,好似大陸嗰個科興,(保護率)得五成,買大細咁,其實打嚟都多餘」,而復必泰的副作用亦太強,故目前先持觀望態度,「但員工就一定唔會逼佢囉,個人自由嚟㗎嘛」。

黎批評,早前認為如疫情有所好轉,政府將會放寬措施,「但而家佢就好似要脅你(打針),因為有呢個要脅,就冇得放寬㗎喇喎,可能遲啲清咗零都唔會放寬㗎啦,因為要逼你打針呀嘛」。

對於劃分區域,他坦言「行唔通嘅機會好大」,認為餐廳不可強迫顧客打針,「同埋要睇(接種疫苗後)QR Code(二維碼),可能你可以share㗎喎,我又唔知係咪你嚟,可能一個朋友打完可以分畀100個人⋯⋯呢啲咁嘅制度真係,未諗清楚囉好明顯」。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

一格照片,一個故事,Follow蘋果Instagram!
BannerBanner