餐廳分四類營運  業界混亂

更新時間 (HKT): 2021.04.28 02:00
■全港食肆將分A、B、C、D四個類別營運,業界形容執行細節複雜。

【本報訊】政府把全港食肆撕裂成A、B、C、D四個類別,但運作細節仍有不清晰地方,食衞局與業界代表也未能提供答案。有飲食業界代表指,新安排與早前商討的內容有出入,形容執行細節複雜,需再與當局討論。

稻苗學會會長黃傑龍表示,政府昨公佈的疫苗氣泡安排與業界早前商討內容有出入,「業界群組睇完政府公佈嘅安排,大家都呆若木雞,太複雜,大家都唔知點面對,要詳細研究,我哋仲要搞埋六次換氣率,都未得閒理到呢件事」。

不可隨便轉變模式

據他理解,食肆須選定以那個類別模式營運,不可隨便轉變,「佢唔係畀你一個處所做晒A、B、C、D類,要先揀咗A、B、C定D先,食肆唔可以隨時改變邊個類別,如果揀咗C類,員工就要最少打咗一針疫苗,而顧客又用安心出行,就可安排佢哋坐『安心出行區』,但如果有客人只係填紙仔,咁就照舊四人一枱及營業至晚上10時,到上10時後,就只有『安心出行區』繼續做到凌晨12時」。

舉例說,食肆可否在晚上10時前採用B類模式營運,接待不願使用安心出行顧客,然後10時變身為C類、甚至D類,接待使用安心出行甚至已接種顧客?食衞局沒有答案,業界也不清楚。

香港餐飲聯業協會會長黃家和指出,上周五業界與政府商討疫苗氣泡安排,與政府昨日公佈的內容有出入,「整體上係環繞相關方向傾,但就冇提及A、B、C、D四個分類,一開始只係話要求員工打針,冇話又A、又B、又C、又D,我哋都覺得有啲複雜」。他指出,若食肆希望延長營業時間,增加顧客數目,自然會配合措施,相信大型食肆會較積極配合,至於中小型食肆則受限於場所較細,可能會繼續B類模式,即四人一枱及營業至晚上10時。

食衞局常任秘書長劉利群表示,食肆可採用隔板等形式分隔不同區域;有關食肆分區的詳細做法,稍後政府會再作指引。

一格照片,一個故事,Follow蘋果Instagram!
BannerBanner