變種病毒︱來港多年外傭強制打針 僱主轟政府:你逼緊佢哋走 批羅致光「可以唔嚟」論無情

更新時間 (HKT): 2021.04.30 21:00

因應有外傭感染變種病毒恐在社區爆發,政府規定,全港37萬名外傭須於下月9日前做檢測,日後續約也必須接種疫苗。勞工及福利局局長羅致光今日(30日)在記者會表明,接種疫苗是工作簽證條件之一,「佢(外傭)可以選擇唔嚟香港做」。

有外傭僱主團體質疑,若外傭打針後出事,責任誰屬,並批評羅致光的無情言論,「外傭喺香港咁多年,服務咗咁多個家庭,你需要時就叫佢哋嚟,而家就話可以唔嚟」。

質疑硬性規定在港工作多年外傭打針理據

香港家庭傭工僱主協會主席容馬珊兒表示,在疫情當下,政府規定外傭做檢測是無可厚非,相信僱主也支持,外傭亦不抗拒。但她認為時間十分倉卒,全港37萬名外傭要短短一個多星期內完成檢測,不但人多聚集增加感染風險,也質疑檢測中心有否足夠人手。

對於日後外傭續約必須接種疫苗,容馬珊兒指出,若規定新來港的外傭必須接種疫苗是可以理解,但很多外傭來港工作多年,目前在疫情下續約亦毋須先返回原居地,她質疑政府硬性規定的理據,「如果做咗檢測冇事,點解唔畀續約?」

若針後有嚴重副作用責任誰屬

容馬珊兒又指,政府強制外傭續約必須接種疫苗,衍生很多問題,若外傭打針後不適,甚至有嚴重副作用,責任誰屬,包括醫療費等,「邊個擔保37萬外傭接種咗冇一個會冇事?」

她強調,作為僱主,鼓勵外傭接種疫苗,但需要自願性質,不少外傭已年過50歲,而且每個人身體情況不同,以其外傭為例,有生育打算,擔心打針有副作用,已表明不會接種疫苗。

羅致光:佢可以選擇唔嚟香港做

勞福局局長羅致光今日在記者會回應傳媒提問時表明,外傭接種疫苗是工作簽證條件之一,「我唔覺得係一個苛求,佢(外傭)可以選擇唔嚟香港做」。容馬珊兒直斥其言論無情,指外傭在港工作多年,服務數以十萬計家庭,「你需要時就叫佢哋嚟,而家就話可以唔嚟」。

她指,疫情持續逾年,新來港外傭減少很多,如今在港外傭續約又施加條件,恐缺上加缺,認為政府硬推新措施「有少少過火」,「羅局長有冇考慮呢個問題?」她促當局盡快釐清責任,並認為外傭可接受定期檢測,「冇事就可以續約」。

「萬一打完死咗,個僱主就真係慘!」

香港人力資源仲介協會主席廖翠蘭亦批評,政府只給予9日時間讓全港外傭做檢測是過於倉促,「全港有38萬至40萬外傭,當有啲打完針,最少都有20至30萬人要做檢測,咁你有幾多個中心可以幫人打針?」她又指,勞工處曾致電她,着她替外傭網上預約做檢測,惟發現預約網站已「死機」:「我唔明點解係得9日,唔係10日?唔係兩個星期?」認為即使政府在外傭聚會的地方擺設流動檢測站,同樣於事無補,「你咁樣聚埋晒一齊咪仲危險!」

對於將來外傭須接種疫苗後才可續約,廖翠蘭怒轟政府此舉屬不顧後果。她指,外傭被強制接種疫苗,假如出現身體不適,僱主要負上最大責任,「好話唔好聽,萬一打完死咗,咁個僱主就真係慘喇!」她提醒所有僱主要檢視自己為外傭購買的保險內容。

如因拒打針遭解約 恐現勞資糾紛

廖翠蘭續指,現時工作超過5年的外傭,假如被僱主解約,將會得到僱主支付的長期服務金。然而,新例一出,將會出現勞資爭執,「僱主覺得我冇唔請你,我肯續約,係政府唔續畀你;但工人就會覺得,我肯續約,但政府要我打針,呢個係我嘅人權嚟,我唔要打針......咁你個長期服務金邊個畀呀?係咪羅致光畀呢?」

廖批評,不少外傭的確對接種疫苗感到抗拒,部份年輕時成長環境差,或會擔心自己有暗病而不願接種,不理解政府為何要強制外傭打疫苗,「你根本唔係逼佢哋打針,係逼佢哋走,如果要打針嘅一早打咗啦」。

「完全唔明佢個思維係諗乜嘢」

她坦言,現時外傭來港的人數大大減少,「我以前一日做200至300個(個案) ,而家掹掹緊先夠100個,你仲要趕埋而家呢啲走呀?如果你走1萬個、2萬個都夠死,突然間咁多家庭冇咗個工人」。她怒斥,政府強迫外傭打針,後果將不堪設想,「佢(羅致光)有冇諗一諗先?完全唔明佢個思維係諗乜嘢,又唔知個邏輯係乜!」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

一格照片,一個故事,Follow蘋果Instagram!
BannerBanner