李八方online︱架己冷冇份做選委 唐英年幫「潮州朋友」出頭

更新時間 (HKT): 2021.04.30 23:36
唐英年出席林鄭月娥做主持嘅《選委界別分組面面觀》就幫潮州幫出頭。

中央下旨要「愛國者治港」,講到呢樣,嚟自中國各省市嘅大媽大叔又點可以缺席?負責產生特首嘅「選舉委員會」第三界別新增「同鄉社團」,廣東社團總會、福建社團聯會等較大型社團悉數入圍,但由長和資深顧問擔任首席榮譽會長、轄下有42個屬會及十幾萬會員嘅潮屬社團總會,則未有包括在內。早前就有報道指,一班「架己冷」因為咁不是味兒。

前財爺、香港江蘇社團總會會長唐英年,今日喺特首林鄭月娥做主持嘅《選委界別分組面面觀》就話,自己個同鄉會雖然成立日子唔長,但就做咗大量嘅工作,會員都對有份成為「指定團體」參與選委會感到好鼓舞好雀躍,「可以參與完善選舉制度之後嘅治港嘅一個單位」。

唐英年提到,廣東、福建、潮州嗰啲同鄉會係最大嘅,「但當然我有啲潮州朋友而家有少少心理不平衡,話點解潮州我哋冇呀?佢哋好多呢啲同鄉社團都係多年嚟嘅工作」,除咗團體社群、抗疫時出動義工隊派物資,更重要係喺社會事務上動員,「例如做好多撐警啦,喺《國安法》通過之後,我哋都擺咗好多街站,支持《國安法》通過」。

聽到「架己冷」嬲豬,林鄭就立即補飛解畫,話自己都好多潮州朋友,話特區政府做事都有規有矩,喺咁重要嘅「完善」選舉制度法律前,要有「一啲相對客觀嘅標準」喎,所以邊啲同鄉社團可以做「指明實體」,「就係按住內地畀我哋嘅意見,係按以省或直轄市或者自治區做一個單位。我知道潮州就好大,有潮陽、潮汕呀咁,但佢都唔屬於嗰三類」,仲話廣東社團總會都有好多潮州人嘅屬會,可以反映意見咁。唔知「架己冷」聽完有冇下到火呢?

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

一格照片,一個故事,Follow蘋果Instagram!
BannerBanner