李八方online︱李慧琼相信問責官員不問責會改善表現

更新時間 (HKT): 2021.05.01 14:05
資料圖片

日前冧莊做民建聯主席嘅李慧琼話,相信落實咗《國安法》同「完善」選制後,有爭議時問責局長下台就無人做嘅情況會改善,又話問責制要加強,甚至開多啲問責官員位。其實未有《國安法》同「完善」選制嘅問責制實施初期,試過唔止一次有問責局長下台㗎。

「完善」選制後,立法會直選議席由35個一下子減到得番20個,作為最多直選議席嘅建制派大黨,民建聯好難話唔受影響。李慧琼接受Now《大鳴大放》專訪時就話,民建聯要調整發展方向,加強同選委會、不同界別聯繫。

而講到問責制時,佢話「理論上」日後做主要職位嘅人都係「愛國者」,嗰啲「好麻煩嘅事」就唔需要放太多精力,咁就可以集中精力講治港方略。乜嘢係「好麻煩嘅事」報道無詳加解釋。

跟住李慧琼話,香港有官員離任係好大件事,但喺其他有內閣嘅地方,官員離任比較普遍,所以問責制要加強問責。主持就問,過去幾年有爭議、事情最危急嘅時候,局長下台就無人做喎。李慧琼話,相信有《國安法》同「完善」選舉後「會有一啲改善」,估計更多有志、有能之士願意入政府。

睇番問責制實施咗將近20年,因為問責下台嘅官員有被指偷步買車嘅前財政司司長梁錦松、推銷《基本法》23條立法失敗嘅保安局局長葉劉淑儀,同埋處理沙士不力嘅衞生福利及食物局局長楊永強,全部都係董建華時代嘅問責官員。仲有,特首林鄭月娥都話過,主流民意令佢無法再做特首佢會辭職,而家咪好地地仲做緊特首。

講咗咁耐加強問責,李慧琼終於話要分拆職責過多嘅問責局,加多啲問責官員,例如畀多啲彈性局長,有需要時可以請3個政治助理。咁咪即係開多啲位?可能呢個先係重點。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

一格照片,一個故事,Follow蘋果Instagram!
BannerBanner