隔牆有耳:邵家臻:探監人龍破紀錄(李八方)

更新時間 (HKT): 2021.05.03 02:00
邵家臻

政權打壓反對聲音,就算表達和平理性嘅聲音,喺今日香港嘅最低代價,係難避成為階下囚。關注囚權及全力支援被囚手足嘅邵家臻,噚日喺社交網站透露,今時今日「拉的人多,鎖的人也不少」,令到高牆內都有人滿之患。

邵家臻話,據悉呢兩日排隊探監嘅人龍長度又創新高,甚至連本身唔收還柙人士嘅院所,都要改成兼收還柙人士。查實當檢控部門連同法庭已經將未審先囚當成理所當然,咁嘅情況絕對唔令人意外,邵家臻形容,監房地原本同大家距離好遠,如今變成近在咫尺,大家身邊都可能有識嘅人已經、或者將會身陷囹圄,呢種情況唔只係「新常態」,直情係「新變態」呀。

提手足準備換季

其實亦都因為咁,令大家知道要留意住高牆內嘅轉變,邵家臻提醒,牆內一件涉及在囚手足生活些微變化,同時需要牆外我哋關注嘅事,就係唔同嘅懲教院所今日將會換季,男嘅會換短衫短褲,女性會換上短衫長褲,亦即預示夏季來臨。高牆內唔會有冷氣,囚友面對每日活得好似蒸爐裏面小籠包嘅日子到臨。邵家臻仲以過來人身份指「夏天最難捱」,亦都因為咁,更加令佢掛住在囚嘅人。

李八方

一格照片,一個故事,Follow蘋果Instagram!
BannerBanner