隔牆有耳:長毛以文會友:不投白票白投票 
手足下聯「對穿牆」(李八方)

更新時間 (HKT): 2021.05.03 02:00

當權者繼續想喺香港「扮」選舉,但就以「完善」為名操控入閘候選人,香港人根本冇得揀,選舉完全體現唔到民主精神。面對咁嘅選舉,呼籲大家投白票又變成犯法,咁可以點?因為參加民主派初選被指控串謀顛覆政權嘅長毛梁國雄,早前透過facebook專頁拋磚引玉,度出一句上聯「不投白票白投票」,望廣大市民對出下聯,亦同時刺激大家諗計。八方之後收到讀者來信交下聯,同樣被未審先囚嘅吳政亨(李伯盧)亦喺獄中來信參與。

讀者來信都有金句

吳政亨話閱報得知有囚友提出上聯,佢幾經思索之後就對出一句「胡作非為非所為」嘅下聯,咁「胡作非為」講嘅係邊個?吳政亨信中話畀其他人自行解讀。其實佢本來仲想將句下聯親身相告長毛,但後來得知對方因8.18案判刑,即將離開同囚嘅荔枝角收押所,所以只好從獄中來信畀《蘋果》刊登,等囚友之間可以「以文切磋」。

其實唔只吳政亨對出下聯,八方另外仲收到讀者來信,有讀者交出一句「毋送白頭白送頭」,另一讀者就以「堅順民意民意順」以回應長毛;前者不免令人諗起初選案唔少被囚民主派都一把年紀,同時唔好送頭亦係當下大家最要學識自保平安嘅事;而後者聽落更覺欷歔,如果政權係重視民意,又點會搞到香港咁嘅田地?八方覺得,大家咁樣隔空過招,無論下聯係點,大家都絕對有「對穿牆」級嘅功架,因為都係示範緊點樣用對聯將高牆對穿。

李八方

一格照片,一個故事,Follow蘋果Instagram!
BannerBanner