隔牆有耳:11控罪料耗千萬  尹兆堅籲訂閱Patreon幫補(李八方)

更新時間 (HKT): 2021.05.04 02:00
■尹兆堅fb專頁管理人出po列出11條控罪,並呼籲公眾訂閱Patreon以表支持。尹兆堅fb圖片

手機用戶請按此放大圖表

因參加去年初選結果被政權控以「串謀顛覆國家政權罪」嘅民主派人士,仲有36人至今繼續被還柙,案件將會喺今個月底再提堂,換言之,佢哋唔經唔覺會被未審先囚起碼三個月,當中有人仲身負其他控罪,例如民主黨尹兆堅更身負11條控罪,估計最終需要花上過千萬訟費,佢嘅fb專頁管理人噚日就呼籲公眾訂閱尹兆堅嘅Patreon以表支持。

尹兆堅fb專頁管理人話,為阿尹預備緊法律文件同陳情書,因要列出所有控罪畀法官參考,一數先知原來對方孭下孭下,已經孭咗11條控罪,絕對係「嚇咗一跳」,而涉及嘅控罪,包括2018年同黨友林卓廷就立法會二讀一地兩檢條例草案時,尹兆堅被控妨礙立法會人員執行職務同普通襲擊,之後喺修訂《逃犯條例》、《國歌法》、《蒙面法》同港區國安法等接踵而來,尹兆堅未退縮繼續抗爭,令佢被加控藐視罪、干預立法會人員罪等。

不過尹兆堅嘅選擇係拒絕認命,繼續喺議會同街頭做應做之事,之但係打官司要「燒錢」又係好實際嘅,所以公眾除咗寫信旁聽嘅支持行動外,相信亦需要訂閱尹兆堅嘅Patreon,有錢出錢幫輕佢隨時過千萬訟費,最少等佢喺被囚日子,身在高牆內唔需要咁擔心。

李八方

一格照片,一個故事,Follow蘋果Instagram!
BannerBanner