隔牆有耳:抗疫分享大會催眠 
陳肇始瞌眼瞓半粒鐘(李八方)

更新時間 (HKT): 2021.05.04 02:00
■陳肇始閉目養神持續近半個鐘。

醫院管理局每年都搞研討大會,但因去年香港爆發肺炎,所以就停辦,今年就如期舉行,仲搞足兩日。今次大會主題自然離唔開抗疫,所以請咗好多位專家分享抗疫經驗,原本呢啲場合,作為港府抗疫官員,點都要打醒十二分精神聽,但係台下嘅食物及衞生局局長陳肇始竟然閉目養神,仲要一瞌就瞌成半個鐘,認真肉酸。

噚日個研討會喺會展舉行,場內實施社交距離措施,座位之間相隔約1.5米距離,仲邀請多位專家分享抗疫經驗,開幕禮播放國家衞健委主任馬曉偉預錄短片,講明中央高度關注香港疫情,仲話留意到本港確診數字回復低位,期待港府早日實現清零目標,又叫港府加快推廣疫苗接種工作等。

「釣魚」有前科

大會之後有多位專家分享抗疫經驗,包括中國工程院院士鍾南山、政府專家顧問袁國勇同許樹昌等,不過台下陳肇始似乎對袁同許嘅分享冇乜興趣,開始不停瞌眼瞓同「釣魚」,仲要俾人睇到,只有專家完成分享時先會醒下,呢個情況更持續近半個鐘,認真唔畀面!其實陳姑娘喺人講嘢時瞌眼瞓唔係第一次,好似之前財政司司長陳茂波喺立法會宣讀預算案,陳肇始冇幾耐已開始瞌眼瞓,仲要畀傳媒影到佢「釣魚」嗰一刻,真係好難睇。

李八方

一格照片,一個故事,Follow蘋果Instagram!
BannerBanner