荃威、康怡居民「放監」怒撕林鄭感謝信 
泥水工無辜送檢:想自殺 太殘忍

更新時間 (HKT): 2021.05.10 02:00

【本報訊】政府宣佈放寬「疫監」,容許疫廈居民毋須入營檢疫,入營者亦能陸續離開,荃灣荃威花園R座及太古康怡花園N2座居民,昨獲准離開竹篙灣檢疫中心及鯉魚門公園度假村。有居民形容「放監」,但批評有親人因劣食肚屙,有居民撕掉林鄭署名感謝信,亦有泥水工人大控訴,指因在荃威花園R座工作列為須隔離人士,狠批隔離營情況差劣,「我想自殺呀,你去睇睇食乜嘢,住乜嘢!」

荃威花園R座居民昨午近4時起陸續返回大廈,有行動不便女子乘醫療輔助隊專車回家,保安亦在樓下等候協助她將行李搬落車。傍晚近6時,再有旅遊巴抵達,大批居民拿着一袋二袋落車,情況頗狼狽。

斥「政府玩嘢 高官冇腦」

隔離營人士獲發由林鄭署名感謝信,不少居民將怒火發洩在信件上,在記者鏡頭前撕掉信件,有人直言:「佢想用呢封信就想同我哋say sorry?走開啦!」亦有人抱怨政府安排「玩嘢」,「改嚟改去呢啲人(高官)好似冇腦諗嘢咁樣」。一名泥水工人則稱因在大廈工作,被列隔離人士,「捉咗去困咗幾日!」他怒氣沖沖指:「想自殺呀,太過殘忍啦,你去睇睇食乜嘢,住乜嘢。」對隔離中心安排非常不滿。

居民周先生狠批安排混亂,「啲嘢食到我個女肚屙咗幾次,佢叫我入院,呢啲咁嘅環境冇理由入院」。幸女兒腹瀉痊癒,但當他要求職員提供方包等較清淡早餐時,對方竟要求他向社署申請。對於林鄭信件,他反問記者:「粗口講得㗎?」

康怡花園N2座居民昨中午陸續收到離營通知,下午近4時,有居民乘專車返家,部份居民拖着大篋細篋,有小童能提早放疫監回家,甫落車即刻揮手,表現興奮。

不過居民指隔離中心生活苦不堪言,陳小姐(化名)憶述竹篙灣隔離營的伙食、環境惡劣,地板污垢處處,要用漂白水拖地兩次才乾淨,「衣櫃就冧、張床搖搖地」;負責管理的民安隊亦未能解決住客疑難,「甚至連衞生署幾號電話都冇」。直至回家才算鬆一口氣,「感覺唔相信香港辦事(管理檢疫營)能力咁差,所有嘢都below standard。」

居民林先生慶幸母親節當日能「放監」,打算回家休息片刻便外出食飯慶祝。另一居民Lily批評當局通知非常匆忙,鄰房陸續收到通知,惟她一直未有收到消息,至傍晚6時,工作人員更派晚飯,她以為要多留一晚,「諗住都走唔到,咪開罐罐頭鮑同媽咪慶祝母親節」,進食途中被通知可離開,惟有匆匆吃光罐頭鮑魚。

另外,尖沙嘴美園大廈約40戶近80名住客,昨午亦由旅遊巴分批送返大廈,有被送入營的美園大廈餐廳員工指,疑被職員遺忘,下午才被要求再做一次特快檢測,至晚上仍在營中未能離開。

至於前日已被安排離營的東涌映灣園悅濤軒11座居民,亦批評當局安排「亂到七彩」。居民阿星指一家三口被「疫監」折磨,食物質素惡劣,工作人員協助十分有限,收到林鄭信件更是「一睇仲嬲」。他指林鄭信中提到希望港人盡快接種,「佢做咁多嘢,其實係想香港人快啲打針囉」。他認為港人已沒選擇權,「你留返喺香港,淨係聽佢講,你嘈極都冇用𠵱家,只不過係自求多福。」

涉2,300人 仍需定期強檢

首先確診變種病毒的29歲印度裔男子,與其同確診31歲菲籍女友,曾在深水埗福榮街37號住所開派對,昨雖是假期,但不見外傭出入或聚會,亦未再聽到派對聲浪。

衞生署指,較早時因與N501Y變異病毒株個案居於同一大廈而接受強檢人士,經再次檢測並取得陰性結果後,已獲安排離開檢疫中心,涉逾2,300人。他們仍需於確診病人離開大廈當日計起第3、7、12及19日進行強檢,並需自我監察直至21日屆滿。

一格照片,一個故事,Follow蘋果Instagram!
BannerBanner