隔牆有耳:主持選舉節目勁吸dislike 
每集收視幾千 林鄭繼續自high(李八方)

更新時間 (HKT): 2021.05.12 02:00

手機用戶請按此放大圖表

特首林鄭月娥為咗宣傳「完善」選舉制度,不惜自己落場做「選委界別分組面面觀」嘅主持,親自訪問唔同嘅建制自己友,仲要每日重複咁播,雖然除咗佢訪問阿姐汪明荃嗰集,畀阿姐搞到佢尷尷尬尬叫做有人留意之外,其他集數真係冇乜人理,全個系列係YouTube嘅view數少,嬲數多,不過市民唔關心冇緊要,最緊要林鄭自我感覺良好,佢前晚喺央視節目入面,就自誇自讚自己雖然無接受過主持訓練,但就完全符合晒做主持嘅要求!

自詡40界別都有朋友

林鄭前晚接受央視《新聞1+1》節目訪問,期間主持人問林鄭點解有條咁嘅橋,由佢自己做主持訪問,佢喺個節目又有咩「收鑊」呢?有央視畀個咁大個舞台佢宣傳自己,林鄭嘅自信返晒嚟。佢話做主持人要有權威,又要熟書,仲面不紅氣不喘咁話,為咗節目效果氣氛可以好啲,主持要同嘉賓「友好」,佢隨即話自己做咗幾十年政府官員、又係特首,熟書就唔使講,又自誇差不多喺40個界別都有朋友,所以同嘉賓感覺非常親切。

佢就講到自己咁勁,但收視又點呢?八方睇YouTube嘅「選委界別分組面面觀」view數,除咗阿姐嗰集有40,000幾,其他都係幾千咁上下,仲要有千幾、兩千個dislike,like就得幾百,似乎觀眾已經表咗態,不過唔緊要,至緊要林鄭自己like就得。

李八方

一格照片,一個故事,Follow蘋果Instagram!
BannerBanner