隔牆有耳:彈現屆房策 騷疑似政綱 
689紅桃大計 為 777賀壽(李八方)

更新時間 (HKT): 2021.05.14 02:00

手機用戶請按此放大圖表

八方噚日寫行會成員葉劉淑儀話,相信特首林鄭月娥一定爭連任,其實林鄭潛在挑戰者、前特首梁振英近排已開始發功,不斷喺社交網寫文為港府施政「出謀獻策」,噚日佢又講返老本行土地供應,仲拍片重提喺郊野公園邊陲建屋,暗批林鄭政府中止相關研究,令香港房屋問題持續惡化。

暗寸煞停郊野建屋大計

其實梁振英之前借立法會傾改善施政問題,佢已經喺facebook寫文話「變革,由政府職能權責開始」,話要先講政府重組架構,講明係「拋磚引玉」介紹想法,之後再寫文提倡成立文化局同青年事務局。

噚日佢又用中英文拍短片,提出喺大欖郊野公園邊陲撥出不多於100公頃土地,興建約兩至三萬個居屋單位,然後以收回開發土地同建築成本價錢,即呎價6,000蚊出售。佢標榜自己出任特首時,喺最後一份《施政報告》建議過用郊野公園內小量邊陲地帶起公營房屋同非牟利老人院,但半年後政府換屆,新一屆政府中止有關研究,令香港房屋問題持續惡化,點睇都係暗批林鄭政府。

八方左睇右睇,呢啲建議越睇越似參選特首嘅政綱,似乎話梁振英已經開始熱身,相信冇乜人會懷疑。不過,梁振英又似乎對林鄭唔太差喎,好似噚日係林鄭牛一,作為林鄭嘅前上司,梁振英同一日上載自家種桃收成嘅圖片,仲話「送給所有今天生日的朋友」,猶如隔空幫林鄭賀壽。桃有吉祥象徵,寓意長壽,所以最啱送畀老人家祝壽,不過原來送桃亦可以象徵男女愛慕之情,咁究竟梁振英送桃係邊一個意思呢?

李八方

一格照片,一個故事,Follow蘋果Instagram!
BannerBanner