選舉改制︱袁彌昌憂未來議會清一色建制派 社會問題「越谷越大」

更新時間 (HKT): 2021.05.16 00:01

一直主張「溫和中間」路線的學者袁彌昌早前在報章撰文,質疑北京以為透過大幅修改選舉制度後,只要加快起樓和進行財富再分配,香港問題即會「迎刃而解」的想法,只是建基於多年來評論人士的論述,不一定能「經得起事實的考驗」。袁彌昌接受《蘋果》訪問時解釋,過去不時與內地研究香港問題的人員交流,坦言很多內地人員的論述「都冇乜調查同研究」,只識投中央所好,認為中央若將香港未來押注在相關人員的「簡單歸因」想法之上,香港的前景「令人感到特別不安」。

記者 林俊謙

袁彌昌於訪問中以2019年反修例運動為例,指當年政府在建制派主導的立法會和區議會下,完全未能掌握香港社會的暗湧,擔心隨着立法會再趨向「清一色」發展,香港的社會問題只會「再谷大啲、谷多啲,冇人知道係點」:「2019年建制派嘅優勢,已經令佢(港府)可以一意孤行去做(逃犯條例)呢啲嘢,而家佢哋全盤掌控、全面管治,加上立法會本身個反饋亦欠奉,又或者佢本身都唔想再聽,咁會唔會有一個更大嘅暗湧出嚟?」

對於中央近年先後推出《國安法》及大改選舉制度,袁彌昌認為與2019年反修例運動直接相關,「運動嗰面贏得太盡,你corner咗北京,搞到佢一定要咁樣」。他指反修例運動初期,港人透過和平方式發聲,的確做得不錯,可惜一直不懂將運動轉化成與中央的談判;中央和港府亦未見讓步,而調查警察處理示威時的做法,更導致香港極不穩定的局面。

他慨嘆在社會兩極化下,昔日如曾俊華、曾鈺成和田北俊般的「淺藍」政治人物已經「去到被滅絕嘅狀態」,認為立法會現時並無議員能代表「淺藍」的政治光譜發聲,「比較開明嘅有謝偉俊、田北辰、鍾國斌,但大家都知道佢哋係身不由己,都講唔到真話」。

問及可曾游說妻子、新民黨議員容海恩為「淺藍」人士發聲?袁彌昌指妻子和新民黨主席葉劉淑儀原適合擔當有關角色,但由於葉太是保安局局長出身,外界期望該黨作風「要左啲、強硬啲」,加上該黨定位「有啲混亂」,有時亦「身不由己」、要接受中央的「硬任務」,故難以改變目前的政治定位。

「入得立會某程度是中央欽點」

近期不少中間派鼓勵民主黨繼續派人參選,袁彌昌是其中一人,但他坦言現時不便講得太多,因不想對該黨施加額外壓力,認為目前「邊個越講呢啲嘢,只係令佢哋更加難入返去(立法會)」。

事實他對民主黨繼續派人參選不樂觀,指該黨9月作出決定前要先經歷6.4、7.1、7.21、8.31等敏感日子,加上大批民主派區議員或因政府宣誓制度被DQ,認為政府處理上述事件的手法絕對會左右民主黨最終決定,他亦不諱言:「其實你今時今日入得去(立法會),某程度都係(中央)一種欽點,呢個真係避唔開,所以我覺得民主黨要做呢個決定都好難。」

至於他又會否再參選立法會?袁表示仍要觀望,但稱至今仍認為若民主派不再參選,自己作為「中間派」就應該參選,希望在建制派主導的立法會發揮制衡作用,在立法會「講返啲真話、講返啲人話」,包括在中央推出有爭議性的政策時,為港人「劃返條線出嚟」,反映香港真正民意,直指:「建制派而家已經變成『國家隊』,唔會劃呢條線。」

----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

一格照片,一個故事,Follow蘋果Instagram!
BannerBanner