新任天主教香港教區主教周守仁籲聆聽年青人 批演講廳式對話「係一場騷」

更新時間 (HKT): 2021.05.18 11:06

自上任主教楊鳴章去世後,天主教港區主教一席懸空2年,教廷終在昨(17日)宣佈任命耶穌會的周守仁神父出任該位。62歲的周守仁於2018年起擔任耶穌會中華省會長,在港台澳兩岸處理會務,亦是九龍華仁書院、香港華仁書院兩校校監。周守仁是繼榮休主教陳日君樞機後,再一位出任正權主教的修會人士。有神職人員形容周為人圓滑,不會與政權硬碰,相信將與中方有一段蜜月期。

稱「原本唔係好願意」上任

教區於早上10時舉行記者會,天主教香港教區候任主教周守仁神父聯同天主教香港教區宗座署理湯漢及天主教香港教區輔理主教夏志誠出席。周於記者會上指,有傳媒形容他上任是為勢所迫,他澄清從來沒有受到任何威迫,「可能大家都睇到我原本唔係好願意,因為我相信由神職班出任主教會好啲,但教宗都好明確係想我做嘅,咁我都會服從教宗」。

原為中華省省長的周守仁,需於今天正式宣佈將出任港區主教後,方可找尋下任省長繼任人。周笑言做港區主教要傳承一段歷史,感到任重道遠,又表示:「我一路都係做教育工作,我一直都好上心,所以我對教區唔係好熟悉,不過我可以依靠湯樞機、整個教區嘅人一齊做好佢。」

「不想看到」中國拆十字架 拒用「打壓」字眼

至於問到天主教在中國的情況及政治環境,是否存在打壓,周指拆十字架的行為當然不想看到,但認為背後有很多故事及背景,不願在未充分理解前評論,「香港教會好清楚一件事,中梵未建交㗎其實,所以我哋只可以同教廷反映。打壓呢個字眼都有唔同重量同睇法,我係希望大家能夠多啲了解、多啲和諧嘅生活。我唔想用打壓呢個字眼。」

至於任命有否得到北京同意,作為緩衝緊張關係的權宜之計,周指:「有冇通知北京,我唔知,呢個係梵諦岡同中國嘅事,如果佢覺得要講的話(就會講),但我唔知道。」

聆聽年青人 「思想空間係重要」

周表示出任主教後,希望能夠幫到真正被忽略的群體,當中最重要的是陪伴年青人,「陪伴係最重要,當然亦包括有同理心嘅聆聽。大家都知我做學校,我哋都好強調要幫助學生學識同理心。唔需要認同,但要理解同感受。」認為用心聆聽及展現同理心,「先有更大可能走返埋一齊」。

周守仁指,「年青人都好多種,其實唔係單一,所以我哋要了解佢哋自己嘅睇法。多啲了解之後,有機會要搵佢哋一齊去傾。唔係辯論,辯論要拗贏你,唔係咁,我哋係要對談。」周認為過程中不需要認同對方,但能理解對方感受已是好的開始,又表示要為香港祈禱,「呢個好重要,我哋都係愛香港嘅」。

國安法通過後,教育界面對諸多「紅線」,將成為249間學校主辦人的周守仁強調思想空間的重要,「我相信,思想空間係重要,如果冇思想空間,學生成長唔到。希望教育界有返呢個空間,當然有啲嘢好敏感,特別係法律嘅問題。」

稱今年六四會否上街要睇是否合法

周守仁過往曾為悼念六四上街,被問到今年,他表示「我諗要睇下情況…即係…上街係咪合法㗎呢?我哋唔鼓勵、自己都唔會做啲唔合法嘅事」。周其後以英語答問題時補充,悼念六四有不同方式,過往會在公開場合悼念,亦試過無法出席而自己為中國和死難者祈禱。

「演講廳嘅對話 係一場騷」

國安法下的香港,有不少聲音被打壓及封殺,作為宗教團體如何做到可以聆聽各界意見及團結社會?周苦笑一下後表示:「你哋問啲問題真係好難…如果我有perfect answer畀你,我會好開心,但我冇。但我相信真係嘅,對話係好重要,但對話當中要有理解、要有聆聽、有同理心。兩個人互相講嘢唔係叫做對話,或者一個好大嘅演講廳嘅『對話』,呢個係一場騷,唔係對話。」

如若當權者拒絕聆聽人民對話,宗教在社會上可如何引導?周表示,「我就唔知道北京政府或者香港政府係咪只會喺演講廳『交談』,因為佢冇搵過我交談,如果教會幫到啲咩角色嘅我哋都好願意考慮。」在國安法下,與外國機構聯繫或會増加被控風險,周守仁表示,「未有呢個擔心,但要多啲理解將來會點,因為國安法比較新。」

近日中央出手「完善」選舉制度,有指天主教手上有多張選票,周解釋:「我哋天主教係有一票,然後教區99間中小學嘅校長,要同其他人一齊選出14席,唔係好似大家想像中咁多票,大概十幾票,確實數字唔肯定。」至於當中可有任何篩選措施或取態?周表示會採取一向的被動配合做法,並不會影響或干預,「我哋要尊重佢哋嘅政治取態」。

至於想成為一個怎樣的主教,周守仁說:「做一個好爸爸,做一個通情達理嘅校長,做到接近天主嘅慈悲。」

直播重溫

果燃台

《蘋果》Youtube

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

一格照片,一個故事,Follow蘋果Instagram!
BannerBanner