隔牆有耳:牆內九個太陽 汗水濕透信紙(李八方)

更新時間 (HKT): 2021.05.18 02:00
■石牆花噚日喺fb提到監房設施日久失修,連通風都好有問題。

未到6月,香港天氣已經非常酷熱。監獄入面既夏天,環境又有幾惡劣?石牆花噚日就喺fb寫文提及,大部份監房設施舊通風差,比牆外世界高兩、三度,赤柱囚友經常形容,熱到好似有「九個太陽」。

每日放風時間對正烈日當空,以往操場只擺咗兩三把太陽傘畀職員,幾經爭取後終於有八至九把,囚友都瑟縮於傘下,有時熱到要將水照頭淋降溫。石牆花又提到,監房傢俬多由不銹鋼製成,枱凳都㷫烚烚,坐都坐唔安。暴曬咗一整日,監房頂樓就最熱,令人諗起都出汗,但係一排氣窗因為日久失修,都已經打唔開散熱;有一款倉門係密封式,就更熱上加熱。

盼理解太熱難寫信

牆外世界有好多消暑方法,不過室內囚友就處處受限,例如返倉後不能沖涼,只能用清水抹身,最弊抹身動作太大又會爆汗,石牆花形容「在監房裏降溫是一大學問」,非常手段就係將清水倒在地上。正正因為夏天令囚友全身濕透,寫信都會將信紙浸濕,太熱時真係好難寫信,希望牆外朋友可以理解啦。八方好認同石牆花所講,當炎夏遇上一陣大雨,不妨少啲埋怨,多啲諗下牆內嘅人,呢場及時雨絕對幫到佢哋消暑。

李八方

一格照片,一個故事,Follow蘋果Instagram!
BannerBanner