檔口設連儂牆「自由社會可以發聲」
報攤撐《蘋果》︰唔好減紙

更新時間 (HKT): 2021.05.19 02:00

【本報訊】港版國安法立法近一年,新聞自由逐步被蠶食,近日更傳政府或取締《蘋果日報》。灣仔「真黃報紙檔」檔主貞姐無懼時局,檔口依舊貼滿文宣及闢出一角變身連儂牆,指市民連日掃清《蘋果》,她寄語艱難時刻要勇敢發聲,「我哋一定會贏,只係時間問題。」

貞姐在灣仔開報攤10多年,指《蘋果》銷量是其攤檔榜首,特別去年壹傳媒創辦人黎智英被捕時,一日賣出500多份,如今銷量仍維持每日70多份,不乏跨區支持者。

引入政治書 仍設連儂牆

日前《台蘋》停刊,近日屢傳《蘋果》會被取締,惟貞姐滿有信心,又稱「唔好減我紙呀,呢兩日得60幾份,我又唔夠,搞到我要去同行家拎,但行家都賣晒。」

她指反修例期間一直支持手足及《蘋果》,自去年7月(即港版國安法生效起),眼見不少藍絲變黃絲,她認為是時候表態,即使檔口不大,也特地闢出一角變身連儂牆,還引入一些政治刊物,以表達政權的不公:「香港始終係一個自由社會,可以發聲嘅,點解唔發聲呢?」對於在港版國安法,有機會被視為煽動或分裂國家,貞姐亦無懼,「見步行步囉,唔畀黐咪用白色memo紙遮住囉」,更聲言「不會放棄,《蘋果》加油」。

記者在報攤採訪時巧遇灣仔街坊「阿草爸」,他以往多次自製畫作貼在報攤,也是《蘋果》忠實支持者,「我支持《蘋果》,係因為佢仲肯講事實、講真相。呢個係要勇氣,亦都要代價,係唔容易」。他寄語勞苦大眾一齊捱、一齊撐,「《蘋果日報》都唔係孤單。」

對於《蘋果》有被取締可能,阿草爸感到無奈與可惜,認為當權者用盡方法打壓異己,「佢係取締香港,唔係取締《蘋果》蘋果呀!唔畀你紀念、唔畀你有歷史」,又指「所謂執法、法治,係無依據、無理據,無公義可言。」

他認為升斗市民能力有限,只能透過文字圖畫宣洩。昨天他帶來自家墨寶,寫了三個以鹿和馬字併合而成的字,諷刺政府指鹿為馬,「到底個政府用邊一種指鹿為馬嘅方式呢?總之係製造出一種冇人知嘅概念,同個政權方向唔同,就自不然會被打壓、制裁、剝削,咩都會齊。」

一格照片,一個故事,Follow蘋果Instagram!
BannerBanner