工聯會黃國健慫恿外傭僱主以薪買假 黃定光斥違法:唔好誤導僱員

更新時間 (HKT): 2021.05.21 16:14

政府在未取得勞工顧問委員會共識下,單方面建議以8年時間,分階段將勞工假期由12日增至17日,與法定假日看齊。立法會《2021年僱傭(修訂)條例草案》委員會今(21日)開會審議,有議員指新增假期加重外傭僱主負擔,工聯會榮譽會長黃國健竟公開提出僱主可用錢「買傭工嘅假期」,遭委員會主席、民建聯黃定光當面駁斥其言論違規違法,強調法定有薪假期不能以薪代假,「你哋工會一定要清清楚楚,唔好誤導啲僱員,以為攞錢就可以搞掂」。

黃國健引外傭僱主以薪買假反駁邵家輝

多名議員就劃一法定及勞工假期提出修正案,大多建議提早實施及縮短落實年期。自由黨邵家輝表明反對修正案,指現時疫情下,各行業都五癆七傷,並批評政府沒得到勞顧會共識,「根本未傾掂,政府夾硬擺上嚟(立法會)」。他又指,早前有市民在電台節目表明,不同意將劃一假期適用於外傭,認為會影響僱主,「針唔拮到肉,又點會知痛呢」。

工聯會黃國健不點名反駁,指有些議員將劃一假期「拉埋」到外傭,更特意「提醒」,指現時已有些家庭以「補薪」方式,「去買傭工嘅假期」,僱主按照外傭月薪支付二、三百元,對方便可在假期繼續工作,「好多傭工係願意去做」。他又指,對於有能力聘請外傭的家庭,「一年五日使多千零蚊去處理假期問題,我覺得唔係好嚴重嘅事」。

黃定光痛斥:以薪代假犯法

然而,黃國健發言後,委員會主席、民建聯黃定光隨即作多項澄清,首先指今次新增有薪法定假期是「涵蓋」外傭,「唔係話唔關佢哋事,我哋而家拉埋嚟,因為外傭都係勞工,有關條例係涵蓋佢」。

其後他更加重語氣駁斥黃國健,指法定有薪假日不能以薪代假,「如果以薪代假係犯法,明唔明?」並警告指,「你千祈唔好誤導市民,明唔明呀?OK?」

「非法嘅嘢我哋唔能夠喺度傾」

不過,黃國健繼續死撐,稱現時很多外傭自願賺取「假期錢」,去做替工,且恆之有效。黃定光隨即打斷黃國健發言,指其言論是違規違法,「我唔能夠畀你咁樣講⋯⋯我哋呢度立法會,係法律之外、非法嘅嘢我哋唔能夠喺度傾」。黃國健不滿被禁發言,反指黃定光在劃一假期議題上有立場,「我知你有立場,但有立場唔應該喺呢個時候表達」。

黃定光再度發炮,指其立場合規合法,沒偏幫任何一方。此時黃國健改口稱,指很多時若家庭有需要,其外傭便會介紹「姊妹」在假日做替工,聲稱他剛才的發言是指「畀錢請替工」,而非強逼家傭違規補水,「我完全冇咁講過」。他又謂,現時疫情下,有僱主擔心外傭外出受感染,寧願付錢要求對方留在家中,順便看顧長者,反指黃定光有誤解。

黃定光否認有誤解,「剛才你所講嘅,同而家所講嘅,我覺得係兩碼子事,兩碼子事」,指疫情下外傭在假日留在家中,不等於要工作,「可以喺屋企瞓覺」,且是每工作七天所享有的休息日假期,而非今次討論的17天勞工法定假期。他又駁斥黃國健提出的用錢請替工是走法律罅,重申法定有薪假期不能以薪代假,「你作為工人工會,應該對有關條例好熟悉」。

勞工處:僱傭條例列明不能以薪代假

雖然工聯會其他議員嘗試為事件降溫,但自由黨邵家輝繼續「助攻」,促勞工處釐清黃國健的言論,僱主是否可用錢買假,以及外傭能否去另一家庭做替工。

勞工處助理處長(勞資關係)梁樂文表示,僱傭條例清楚列明,僱主不能以薪取代法定假日,「即使員工同意,都唔可以」。若僱主要求僱員在假日上班,雙方可協商,再另行補假。

他又指,外傭來港工作需簽訂標準僱傭合約,當中亦有按入境條例限制外傭所屬的僱主和工作地點;若外傭為非合約列明的僱主及地點工作,即違反入境條例,「我哋就會覺得有啲問題」。

黃定光偷笑:我係講明法律

梁樂文解釋期間,黃定光不禁竊笑,其後更表示,「所以呢,唔好話我有立場,我係講明法律,如果請外傭做替工係犯法㗎」。

他又補充,雖然法定有薪假期不能以薪代假,但在僱主和僱員雙方協調下,前後60日可以調動有關假期,妻子是工聯會榮譽會長林淑儀的黃定光亦不忘提醒,「呢樣嘢你哋工會一定要清清楚楚,唔好誤導啲僱員,以為攞錢就可以搞掂,累死雙方,明唔明呀?」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

一格照片,一個故事,Follow蘋果Instagram!
BannerBanner