隔牆有耳:保皇派新搞作 擬列負面清單 
立會管埋衣着 禁波鞋牛仔褲(李八方)

更新時間 (HKT): 2021.05.21 02:00

手機用戶請按此放大圖表

立法會無晒民主派,一班建制派不斷收緊《議事規則》,但建制派似乎覺得未夠,噚日又有新搞作,限制議員出席大會期間嘅衣着,仲話要搞張負面清單,列明不恰當服飾,包括運動裝、波鞋、牛仔褲、帽等等,仲講明唔跟就要罰。

立法會議事規則委員會噚日開會,討論修改《議事規則》,委員會主席謝偉俊噚日開完會之後話,佢哋將修訂《議規》內有關議員服飾要求,以後寫明出席會議者須穿「商務服飾」,修改規則可令衣着保持莊重,但呢個衣着規定僅限逢周三、四立會會議,暫時唔適用喺法案委員會同事務委員會,到時仲會有張「負面清單」,列出議員唔可以着去開大會嘅衫褲。包括運動服、牛仔褲、波鞋等等,仲講明,唔跟規矩嘅議員先由立會主席勸喻,如果仲係唔遵從,或會構成「行為不檢」。

損立會「尊嚴」標語將禁

為咗針對以往民主派成日喺立會會議展示標語抗議,謝偉俊話議規會計劃修訂埋《內務守則》,規定議員展示標語僅限於「幫助發言」,只限於議員座位範圍,議員唔在席就不能展示,標語亦唔可以令立會尊嚴受損害、唔阻礙其他議員及大主席視角。

其實着便服開會、展示標語抗議,唔只民主派議員做,建制派都有,好似謝偉俊都曾經喺立法會着波鞋同短褲,究竟係搞民主派定玩自己友?何況將來好可能冇民主派入立法會,一班建制派搞壇大龍鳳,就係唔想見到狄志遠、馮檢基着短褲個樣?

李八方

一格照片,一個故事,Follow蘋果Instagram!
BannerBanner