隔牆有耳:話放假湊仔辛苦過返工 
老闆偉論撐無制限OT (李八方)

更新時間 (HKT): 2021.05.24 02:00

手機用戶請按此放大圖表

香港有班僱主,又或有班所謂僱主代表嘅言行不時令人嘆為觀止,數遠啲成十年前有個「廿蚊張」張宇人,話最低工資應該訂喺20蚊水平,又講過有打工仔會刻意變性呃產假,佢似乎後繼有人呀,作為勞工顧問委員會資方代表嘅香港工業總會理事郭振華,噚日就增加法定假期提出咗哲學級偉論,就係話畀打工仔放多啲假,會仲辛苦過返工。

究竟點解放假會辛苦過返工?阿郭生噚日出席港台《城市論壇》時話,如果第日政府增加咗法定假期,咁多咗五日假,好多打工仔都係返屋企湊仔湊女,反而以前冇多咗假係唔使做呢啲嘢嘅,多咗假以後就會多咗呢啲「工作」,所以打工仔放假唔一定比返工輕鬆。呢個講法,唔知係咪反映緊阿郭生嘅內在心態,即係家庭生活原來好似返工咁?

職工盟:去公園跑成日都開心

香港家陣日日都有荒謬事發生,同郭振華呢啲謬論相比,可能已經唔算嚇人。雖然係咁,都要以正視聽嘅。好彩同場有職工盟統籌幹事王宇來出席,聽到之後就笑住反駁,話郭振華個說法猶如哲學問題:「咁究竟返工辛苦啲定放假辛苦啲?」王宇來嘅答案就好清楚,亦相信係好多正常人嘅心聲,就算同仔女去公園放電陪跑成日都好,心靈上都係舒服咗、開心咗,但呢啲道理,對於啲成日想打工仔「係咁OT我畀埋條命你好冇」嘅僱主嚟講,又點會明呢?

李八方

一格照片,一個故事,Follow蘋果Instagram!
BannerBanner