隔牆有耳:羅致光撩交嗌 寸社福界冇常識(李八方)

更新時間 (HKT): 2021.05.24 02:00

講開勞工問題,又點可以唔提成日惹火嘅勞福局長羅致光,之前佢已經因為企硬唔搞失業援助金俾建制派鬧,噚日佢又寫文,批評社福界要政府恢復90年代社福規劃,鬧呢啲人冇搞清楚件事就批評,仲暗寸人哋冇常識,又再激嬲社福界,問佢係咪想撩交嗌?

話業界提出意見人云亦云

社聯同社署幾星期前搞咗個年度社福議題優次會議聽業界意見,羅致光喺網誌話,每年到呢個時候就聽到有人提出希望政府「恢復」90年代嘅社福規劃,又話缺乏社福規劃同整筆撥款津助制度有關。

羅致光話呢啲人對兩件事嘅歷史冇認識,人云亦云,以訛傳訛,因為社署1996年進行最後一次五年計劃檢討,整筆撥款津助係1999年先開始討論,兩者冇關係,又話整筆撥款津助制度同引至社福服務競投亦冇實質關係,仲暗寸提出呢啲論點嘅人,話common sense有幾普及佢唔知,但坊間流傳唔少common nonsense,叫人唔好憑感覺或唔可靠嘅記憶評論喎。

社總外務副主席張志偉話,羅致光雖然錯唔晒,社福措施改變時序上好似冇乜關係,但社福政策傾向市場化係一脈相承,冇得咁抽離講,反問羅致光用呢種態度回應業界聲音,係咪想撩交嗌?

李八方

一格照片,一個故事,Follow蘋果Instagram!
BannerBanner