隔牆有耳:打針有問題 老董:Call我吖 
「即刻嚟睇你哋」(李八方)

更新時間 (HKT): 2021.05.25 02:00

為咗谷針可以幾盡?政協副主席、前特首董建華為咗谷人打疫苗,就親自示範一招擺自己上枱。噚日佢有份成立嘅「香港再出發大聯盟」一周年,有個,《蘋果》「立場」就冇份入場,但場內行家老友就傳返單料出嚟,就係老董致辭嗰時,不忘呼籲市民去打疫苗,仲搵自己嚟做人辦,話打咗都冇任何問題。

年屆84歲嘅老董話,身邊有人催佢去打疫苗,佢已經成80幾歲人,「第一個打疫苗」,仲話董太平時咩都唔肯做,但今次就陪佢去打針,「我哋好早就去咗,真係一啲都無事,你哋(香港市民)真係去(打疫苗)啦,冇事嘅!」仲話如果有問題,就打電話畀佢,「我即刻嚟睇你哋。」之不過,去到有返咁嘅年紀打疫苗,面對個問題隨時係生定死,唔知老董到時係打算去邊睇人哋呢?

指移英港人冇遠見

老董除咗谷針,又點可以唔唱好香港?佢形容父親當年將佢帶嚟香港係「本事大」,大讚父親、已故船王董浩雲一早睇中香港,認為香港係最好地方,之後老董批評𠵱家移民英國同外國嘅港人冇遠見,又話香港同國家嘅好時刻正在來臨,仲引述有美國朋友大讚中國成功控制疫情,認為美國比唔上中國,但又話中國同時唔可以太驕傲。

噚日記招除咗有老董,又點少得另一個政協副主席、前特首梁振英?佢近日同特首林鄭月娥隔空過招互片,外界視為特首選舉前哨戰,記者另一焦點,自然就係問梁振英選特首問題,點知大聯盟秘書長譚耀宗就做架樑幫手擋駕,拒絕晒同記者會主題冇關嘅記者提問,連有線記者以「與香港穩定有關」為由,問到中央會否禁止今年六四集會都唔畀問,搞到梁振英失去反攻林鄭嘅機會。

李八方

一格照片,一個故事,Follow蘋果Instagram!
BannerBanner