隔牆有耳:今晚7點「超級血月」天文台開live(李八方)

更新時間 (HKT): 2021.05.26 02:00
■想睇晒成個月食過程,今晚7點09分可以上天文台fb在線等啦!

今日香港將會睇到一個特別天文現象,就係會出現月全食,同時又係全年最大嘅超級月亮,即係全年最大嘅滿月,而且喺月食期間,月亮會變成暗紅色,即係坊間所謂嘅「超級血月」,難得有罕見嘅天文現象,天文台自然想令更多市民睇到,所以今日將會係天文台嘅facebook直播成個月食過程。

港東南面有利觀賞

天文台係facebook出po,話如果天氣情況許可,市民有機會睇到成個月全食過程,仲話呢次月全食會喺今晚7點09分開始,到7點28分結束,呢段期間月亮係唔會完全消失嘅,而係會呈現暗紅色,亦即係所謂嘅「血月」。

雖然坊間有傳「血月」係不祥之兆,但八方查過網上同天文台嘅資料,其實月亮呈現暗紅色都係自然現象,因為太陽光入面嘅藍色波段喺地球大氣層散射過程中被散射,剩餘嘅紅光再被折射到月球上面,所以月亮就呈暗紅色。

如果唔想睇網上直播,市民去邊度親身睇最好?太空館建議市民可以去面向東南面、不受阻擋嘅地方睇,好似屯門海濱、大埔海濱、黃埔海濱或者石澳等地都適合,到時市民用肉眼已可以睇到。

李八方

一格照片,一個故事,Follow蘋果Instagram!
BannerBanner