賞超級血月人海逼爆黃埔 可愛童12年後拒帶父母再睇:老喇上山危險會跌落街

更新時間 (HKT): 2021.05.27 04:22

2021年5月26日晚,香港難得一見超級滿月加月全食(超級血月),儘管只歷時短短約19分鐘,仍吸引大批市民到石澳和黃埔等地探月。到黃埔觀月的人海,更企出馬路,相當誇張。不少人更帶備「長炮」拍攝這天文奇景,可惜雲霧較多影響觀賞,下次要等到2033年。

在石澳,有攝影發燒友坦言「有啲失望」,惟明白拍照屬天意,「影唔到都開心」;亦有新手龍友因疫情開啟觀星影相之路,「去唔到旅行咪搵啲新嗜好」,對今次血月體驗感滿意。有熱愛觀星的男童可愛地稱,12年後不想帶同父母再來看超級血月,因他們屆時「老喇,上山危險,好多機會跌落街」。

攝影發燒友:影到開心、影唔到都開心

攝影發燒友忠哥自言多拍攝銀河,已影了十年八年,今日早於4時半到達石澳,因之前有在此地拍下美景的經驗,「諗住呢個水域寬闊啲」。可惜今日雲層較厚,難以拍下「月全食」一刻,忠哥直言有些許失望:「水平升上嚟嗰下影唔到,因為低層雲太厚,完全睇唔到佢已經食緊嗰個畫面。」不過,他心情未有受影響,笑言都是純天意,「影到開心、影唔到都開心」,並指以往月全食多於入黑時出現,今次「仲有啲藍色」,是各有各的美態。

攝影新手:疫情阻外遊 愛上在港觀星

另一名攝影發燒友Michelle同樣於4時半左右到達,「早啲嚟,驚搵唔到車位」,她本來預計石澳的水平線較清,大機會影到月亮「食住」從水平升上的一幕,雖然最後成果未如預期,但她未有失望,「影天文嘢都係咁」,並指自己在月亮入雲前都拍攝了滿意的照片,「都幾靚、OK吖」。

Michelle為今次超級血月準備充足,帶了600mm的長鏡頭及追星儀追蹤月亮位置,不過看似專家的她,其實只拍攝了天文現象短短一年,「其實我係舊年先開始玩,因為疫情,去唔到旅行咪搵其他新嗜好」。雖然已過了月全食,她仍打算繼續留低,希望再試試拍下美景。

鄧小朋友:嚿雲好似海豚咁遮住血月

除了一眾攝影發燒友,亦有小朋友特意來觀看超級血月。鄧小朋友約7時到石澳,形容「個月亮大啲、紅色啲」,不過看了一段短時間後,「就好似有一嚿雲好似海豚咁遮住咗,我就喺度諗點解會咁樣」。之後他上山便能再看到多少少月亮,「但已經睇唔到全部」。

他指,自己在觀月時「有好多問題喺個心入面」,包括為甚麼月亮會變成紅色等,而他平日亦很喜歡研究天文科學等。不過被問到2033年再現超級血月,會否再來觀月時,他表示只會自己一個來看,因下次「爸爸媽媽應該已經老喇,所以我唔想帶埋佢哋嚟……因為要上座山危險,有好多機會跌落街囉。」

-----------------------------

蘋果App大升級 更簡潔更就手!了解更多立即下載體驗

一格照片,一個故事,Follow蘋果Instagram!
BannerBanner