六四32︱無懼用自己方式悼念 支聯會創會義工林榮江:做到臨死嗰日

更新時間 (HKT): 2021.05.27 00:01

支聯會內人稱「大哥」的林榮江,自89年5月支聯會成立開始,即擔任該會義工,至今長達32年。言談直率爽朗、予人「鐵漢」感覺的林榮江,談到香港由過去每年六四,維園都會亮起燭光,變成今年踏足維園亦隨時被捕,不禁傷心落淚,坦言從沒想過香港會變成如此境況。雖然港人今年未必能再踏足維園悼念六四,但林榮江認為仍可以用不同方式,表達對六四事件的感受,最重要是「對得住良心」,「大家問自己,呢個(六四)燭光代表乜嘢?係代表希望、代表堅持、代表無畏無懼嘅精神。你哋認唔認同呢個精神?如果認同,就喺可以嘅範圍,用各自嘅方式去表示!」

記者 林俊謙

1989年6月4日下午,20萬名香港市民身穿黑色素服齊集跑馬地,參加支聯會舉辦的「黑色大靜坐」,當年25歲的林榮江是其中一人,更即場填寫了支聯會招募義工表格,再於同年10月1日起,開展其至今長達32年的義工生涯。林榮江接受《蘋果》訪問時笑說,當年報名做義工純綷是一腔熱血,「覺得件事有啲意義,唔好成日掛住搵錢啦,就第一次做義工」。

為萬點燭光 一切都值得

這股「熱血」持續長達32年,林榮江解釋只為堅持「做認為應該做嘅嘢」,稱自己與前特首董建華一樣,只希望「中國好,香港好」,卻難掩憤怒:「咁都要中國真係好先得㗎!問題係而家個個只識鬥吹水,個個都由得佢(中國政府)做錯嘢,然後去阿諛奉承話佢好,咁佢係咪好先?唔肯聽真話,咁係咪好先?你淨係接受講大話嘅嘢,咁係無得講!」

林榮江過去每逢六四前一個多月起,總為協助該會籌辦活動忙得不可開交;在六四集會前夕,有時更只能一天睡上2至3小時;而在晚會結束後,要協助收拾物品送回倉庫,一直忙至清晨,但每次見到台下萬點燭光,總令他覺得一切付出都是值得。對於政權打壓下,維園自此或難再現燭光,他不禁慨嘆:「以前真係做到死,鑊鑊都做到甘;但而家無得做,就覺得好可惜,真係好可惜。」

「冇諗過差得咁淒涼」

回看過去32年付出的時間和汗水,林榮江淡然稱不覺得有很大犧牲,只遺憾有時因為要兼顧工作,未能全程參與,他慨嘆:「錢我有機會搵返,但我有啲嘢係miss咗,一生人就無㗎嘞。」

爭取平反六四至今32年,又可曾想過香港變成今日如斯模樣?滔滔不絕的林榮江,談到此也不禁語塞,並感觸落淚說:「冇啊……我真係冇……我冇諗過差得咁淒涼……真係好差。」他亦估計,隨着支聯會主席李卓人、副主席何俊仁和秘書蔡耀昌先後入獄和被還押,加上該會副主席鄒幸彤、常委趙恩來、麥海華、梁錦威和梁國華,亦被控去年6.4在維園參與未經批准集結,案件下月11日提訊,支聯會隨時只餘下數名常委仍屬自由身。

「總有機會開花結果」

縱然如此,林榮江卻未有打算放棄多年的義工工作,表明希望「守到幾耐得幾耐」,認為即使義工無支聯會常委帶領,亦能按多年經驗運作,底線是在現有空間下盡量發聲,並避免被捕,「我今年57歲,已經係人生大部份,我點會唔堅持?臨到死嗰日,都係做得到都做!如果佢唔畀,咪用其他方式、其他嘅名義囉,冇問題嘅。」

那港人今年還可以如何悼念六四?林榮江認為港人仍可以用不同方式,表達對六四事件的感受,包括在六四當晚亮起手機燈光,在維園以外的地方散步,認為香港人最重要是「對得住良心」,「大家問自己,呢個(六四)燭光代表乜嘢?係代表希望、代表堅持、代表無畏無懼嘅精神。你哋認唔認同呢個精神?如果認同,就喺可以嘅範圍,用各自嘅方式去表示囉。」他又堅信,要求平反六四的訴求,早已深植香港人心中,「有啲嘢而家未必咁易表現出嚟,但總會有機會爆出嚟,開花結果」。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

一格照片,一個故事,Follow蘋果Instagram!
BannerBanner