隔牆有耳:全球遴選被揀中  
蔡玉玲進軍哈佛(李八方)

更新時間 (HKT): 2021.05.27 02:00

香港傳媒業正經歷緊史上嚴冬,新聞自由更係敲響晒個喪鐘,《蘋果》同港台都處身刀鋒之上,但喺最壞嘅時刻會催生出最好嘅記者,唔少行家都繼續盡忠職守,做出無愧於時代嘅報道,而呢個努力仲獲得國際權威認證同認同,好似因為7.21報道被定罪嘅港台編導「阿包」蔡玉玲,最近獲哈佛大學尼曼獎學金(Nieman Fellowship),將到哈佛大學進修一年。

哈佛大學尼曼獎學金喺國際新聞界享負盛名,由1938年開始,每年從全球遴選記者去哈佛大學進修,至今已有近1,600個來自全球各地嘅記者獲獎。

研傳媒在極權下生存

佢哋前日公佈咗最新嘅獲選記者名單,「阿包」蔡玉玲亦榜上有名,獎學金個網站就介紹「阿包」做嘅報道,關於政治、人權同貪污新聞,而話佢係第一位因為調查元朗白衣人事件而被捕同定罪嘅記者,而佢可以今年秋天出發,到哈佛研究獨立同調查新聞媒體如何喺獨裁政權下生存。

至於今屆其他獲選記者,一共有22人,包括嚟自《衛報》、美聯社、《華盛頓郵報》同《洛杉磯時報》等。「阿包」就話,會抱持謙卑嘅心同開放態度,喺未來一年好好學習,又透露自己去海外進修諗法始於2018年底,當時佢離開任職近三年嘅《傳真社》,對獨立新聞媒體點喺香港發展同成長抱持唔少疑問,而佢會將過去一年嘅經歷化作養份,努力成為更好嘅人,望學成歸來之時,可以為新聞自由繼續奮鬥,仲約定大家「未來見!」

李八方

一格照片,一個故事,Follow蘋果Instagram!
BannerBanner