李八方Online︱曾鈺成話689指指點點 中央都唔想睇到

更新時間 (HKT): 2021.05.31 00:02

特首跑馬仔未開閘先角力,外界盛傳前特首梁振英已經向北京自薦,近日仲有唔少「梁粉」出文批評特首林鄭施政,為選戰前嚟番個造勢大會。

立法會前主席曾鈺成接受《灼見名家》訪問嗰陣都話,相信梁振英想參選特首嘅消息,不過佢就覺得梁振英同「梁粉」成日指指點點咁批評政府施政,對特區管治無好處,仲話咁嘅畫面北京都唔會想睇到。

稱梁振英當年不連任 因中央憂梁營選委會唔夠票

曾鈺成話,有唔少人想梁振英再做特首,而國家級領導人兼任香港特首係無問題,因為根據《中華人民共和國公務員法》,不少國家領導人都有兼任省部級領導人。

佢又講到,梁振英2016年唔連任嘅原因唔係因為中央政府對梁信任度不足,因為佢卸任後做埋政協副主席;反而係因為中央擔心梁在選委會拎唔夠票當選,出現流選。不過隨住立法會通過「完善」選舉制度,曾鈺成都話冇咗選委會障礙,自然容許「表現較好」嘅梁振英再落場競賽。

稱兩任特首隔空駁火如「自燃」

不過,被喻為「政界KOL」嘅梁振英近日連番批評林鄭政府,就連曾鈺成都話「很有分量」,擔心咁「指指點點」會影響市民對施政嘅信心,仲可能對林鄭唔公平;仲話兩任特首咁駁火係不利港府管治,好似「自燃」,咁嘅畫面北京都唔想睇到。

-----------------------------

蘋果App大升級 更簡潔更就手!了解更多立即下載體驗

一格照片,一個故事,Follow蘋果Instagram!
BannerBanner