隔牆有耳:毛漢籌旗 梁振英磅水 林鄭未出手(李八方)

更新時間 (HKT): 2021.06.01 02:00
■毛漢(右)日前擺街站為同鄉籌款購買醫療設備。毛漢fb圖片

特首選戰角力日日有新消息,政界盛傳有意再競逐特首之位嘅前特首梁振英,除咗頻頻同現任特首林鄭月娥隔空交手之外,亦唔再限於係鍵盤出招,而係親自見人「交朋友」。曾經喺反修例示威中不幸被水炮車射中嘅香港印度協會前主席毛漢早前發起籌款活動,希望籌300萬買醫療設備送去印度幫幫同鄉,估唔到梁振英噚日走去見毛漢,仲話可以幫手買醫療物資。

曾蔭權都到錫克廟捐錢

毛漢噚日向傳媒透露,梁振英噚日拜訪咗錫克廟,仲向佢哋送上捐款支票,但毛漢未有透露捐款金額。毛漢仲引述梁振英話高度評價佢哋嘅籌款活動,呼籲香港市民以行動支持。佢仲透露梁振英開到聲話喺內地認識唔少供應商,如果毛漢購買醫療物資有困難,佢可以幫忙㖭。

除咗梁振英,其實早幾個星期前特首曾蔭權都到訪錫克廟捐錢,毛漢透露兩名前特首都係佢以私人形式邀請捐款,仲打算邀請另一前特首董建華幫吓印度同鄉,至於現任特首林鄭月娥有冇份?毛漢話如果林太肯嚟,梗係求之不得啦!

李八方

一格照片,一個故事,Follow蘋果Instagram!
BannerBanner