李八方online︱天文台報錯雨量逾10,000毫米如海嘯 網民:要坐挪亞方舟

更新時間 (HKT): 2021.06.01 15:47
天文台噚晚報錯雨量,將「10毫米」打錯「10米」,亦即10,000毫米。呢1,000倍嘅差別,就將噚日嘅普通大雨,形容為災難級海嘯。設計圖片

唔少本港氣象迷噚晚(31日)嘅熱門話題,除咗係連場大驟雨來襲,仲包括天文台報錯多區雨量,將「超過10毫米」打錯成「超過10米」,亦即係10,000毫米。呢1,000倍嘅差別,可以將噚日嘅普通大雨,形容成災難級海嘯。難怪好多網民都講笑,話要坐「挪亞方舟先搞得掂」。

話說天文台照舊喺噚晚11點15分出稿畀多間報館,用百零字綜合全日本地天氣概況,都係講番噚日香港受低壓槽影響,間中有驟雨同雷暴之類。但唔少眼利嘅市民發現,天文台報錯多區錄得嘅雨量,將「超過10毫米」打錯成「超過10米」,亦即係10,000毫米,足足相差1,000倍,都咪話唔驚嚇。

10,000毫米雨量究竟係咩概念?而家黑雨警告嘅標準,係香港廣泛地區錄得或者預料每小時雨量超過70毫米。就算剛好達到黑雨標準嘅暴雨,極罕有咁落足24小時,都只係1,680毫米(1.7米)。即使瞬間傾盤落晒咁多雨,相比海嘯級嘅10,000毫米(10米),仲係爭好遠。睇番紀錄,1926年7月19日係香港歷來單日落得最多雨,但都只係得534毫米。

呢單嘢令八方省起,中聯辦旗下《文匯報》網站個幾月前,老屈天文台訛稱超強颱風逼港,發佈假新聞嚇親市民斷正。佢哋唔單止隔咗成日都未更正,俾八方踢爆咗先將篇稿下架,2日後仲登咗篇「來論」,反插八方係「咬文嚼字之賣弄」,將「氣象新聞政治化」,居心不良,猶如「淫婦」。

當日《文匯報》網站嘅標題、內文同圖片說明,的確係虛報風暴消息,仲聲稱係天文台咁講,呢種張冠李戴,唔少氣象迷都話好離譜。不過《文匯報》網站之後登嘅嗰篇「來論」,只係話「標題可能不夠精準」,反而鬧返指正佢嘅八方係「潑婦罵街、無事生非」。

八方一直經營文字,「居心」必然係「咬字嚼字」,因為一旦「不夠精準」,就會好似天文台今次咁,俾人笑到面都黃。但同樣都係出錯稿,天文台只係隔咗15分鐘,就再出稿更正,亦冇寫埋啲多餘廢話,為自己出錯搵藉口,更加冇鬧返指正佢嘅市民。呢種務實嘅回應態度,其他同樣要面向公眾嘅機構,真係要好好學習嘞。

-----------------------------

蘋果App大升級 更簡潔更就手!了解更多立即下載體驗

一格照片,一個故事,Follow蘋果Instagram!
BannerBanner