隔牆有耳:「困頓時刻肩負發揚本土文化責任」
藝評人得獎 遙獻張可森(李八方)

更新時間 (HKT): 2021.06.01 02:00
張可森

藝術根植社會,包括藝術家在內嘅任何人,都唔可能脫離社會獨立生存,所以社會如何,絕對影響藝術創作空間以至題材。藝發局前晚舉行第15屆香港藝術發展獎頒獎禮,唔少得獎者嘅感言都令人聯想到香港時局,47人案被告之一張可森更有份「獲獎」。

演員:繼續為香港講真話

喺頒獎禮上面,好多得獎嘅香港藝術工作者除咗講個人感受,亦借講藝術創作暗喻時局,好似獲藝術家年獎(文學)嘅劉偉成從寫作需要胸襟、要虛心接受他人批評,引申到社會上每個崗位都要有呢種胸襟,仲話「我相信只有好好咁生活,就會喚起我們心底即使微弱嘅光芒,集結起嚟一定可以突破𠵱家嘅困局」。

至於藝術家年獎(藝術評論)得主朱少璋就強調自由對評論嘅重要性,「自由度越大,作者落筆越能暢所欲言」,仲祝願每位真心愛香港嘅朋友,「可繼續喺香港、為香港暢所欲言」。而獲得藝術新秀獎(戲劇)嘅陳秄沁坦言,藝術教識佢乜嘢係真善美,如果佢唔能夠講真嘅說話,我哋就冇可能做到美、善嘅作品,仲話自己會繼續透過劇場,「為自己、為香港講真嘅說話」。

至於無法親身到場領獎嘅藝術新秀獎(藝術評論)得主凌志豪,由藝術家楊秀卓代領獎項同讀出得獎感言,強調喺困頓時刻,文化人更應肩負起將本土文化發揚嘅責任,佢最後更話:「謹以此獎獻給同代評論人林雪平。」林雪平係邊個?呢個其實係一個筆名,真身正係因47人案被還柙嘅張可森。

李八方

一格照片,一個故事,Follow蘋果Instagram!
BannerBanner