理大圍城案電工辯稱去揼骨 控方不斷質疑惹官揶揄「可能主控未去過揼骨場地啦」

更新時間 (HKT): 2021.06.01 14:55

警方前年11月連日圍堵理工大學內的示威者,大批市民到油尖旺上街「圍魏救趙」,試圖營救被困校園的人。四男被控參與暴動及違反蒙面法等罪,其中40歲電工被告自辯稱當晚往揼骨中途在街上被捕。控方今不斷質疑,被告吃完消夜已是凌晨四點半,卻要選擇偏遠按摩店,當晚沒時間睡覺。法官林偉權打斷謂:「可能佢(主控)未去過呢啲揼骨場地啦……但講食飯都會去相熟嘅餐廳,咪又係common sense」。

被告電工鄭信達(40歲)昨自辯時供稱,當日與友人用膳後,打算往桑拿店揼骨,惟途徑彌敦道橫巷時,遭突然衝入的警員以警棍毆打,警員更邊打邊罵:「死曱甴!你仆街啦!」被告及後證實右手手指被打至骨折。

法官質疑:呢啲問題有乜嘢意義呢?

控方外聘大律師張建波今盤問被告,但數度遭法官林偉權質疑:「呢啲問題有乜嘢意義呢?」公眾席與辯方律師團隊不時傳出嘆氣和竊笑聲。張盤問時質疑,鄭與友人吃完消夜之後,已經是凌晨4點半,「搵得師傅嚟可以已經5點,揼完已經7點,瞓到咩你覺得?」鄭表示可以。控方質疑他翌日早上要9點上班,鄭仍指有充足時間休息。

控方又質疑,為何鄭要下班後先回到粉嶺住處,深夜再出油尖旺找朋友吃飯。鄭解釋,由於友人要「湊仔」,所以通常他們會相約在夜晚8點後。控方追問:「你就係想慳啲交通時間,舟車勞頓咪仲辛苦?」鄭回應謂:「我覺得飲酒係樂趣,我唔覺得辛苦喎。」

控方此時再度指鄭沒時間睡覺,林官聞言不禁打斷謂:「點會冇時間瞓覺啫,你自己都數到,問啲有用嘅問題。瞓覺時間因人而異,有啲人瞓一個鐘非常精神,有啲人瞓十幾個鐘都成日攰……」控方反駁謂:「佢從事高空工作」,林官繼續謂:「高空工作又點啫?個個都瞓十八個鐘,咁嚟法庭工作嗰啲又應該瞓幾多個鐘?」

控方詢問鄭為何不選擇較近的按摩店,鄭解釋「嗰頭我唔熟」,亦擔心衞生問題。惟控方仍就此窮追不捨,林官再度打斷謂:「我唔知主控官問呢啲問題有咩意義,可能佢(主控)未去過呢啲揼骨場地啦……但講食飯都會去相熟嘅餐廳,咪又係common sense。」

警棍打至手指骨折 返警署多次要求就醫不獲理會

控方向鄭指出,警員從來都沒有無故用棍打他的右手手指,也沒說辱罵字句,只是他欲逃走才會被打。鄭一律否認,並補充指警員到達橫街時,他已蹲下來,並把雙手放在頭上。

鄭自辯時曾供稱,他被帶到警署後曾多次要求看醫生,但不獲理會。控方今指出,手指骨折應該會很痛,「你(在警署)有冇忍唔住嗌出嚟?」鄭表示有。控方追問:「你嗌得大唔大聲?」鄭表示大聲,並補充指他有向每位經過的警員提出要求。

控方追問:「你咁痛又點頂?」公眾席傳出嗟嘆聲。鄭無奈回應謂:「咁佢都唔理我,我仲可以點啫?」控方繼續質疑,為何他獲保釋後不馬上到急症室求醫。鄭解釋,當日他離開西九龍法院時,雙腳只穿着一對紙拖鞋,他只想回家換衫休息,「都已經頂咗兩日……兩日都冇休息過。」案件押後至7月10日結案陳詞。

【案件編號:DCCC376/20】

-----------------------------

蘋果App大升級 更簡潔更就手!了解更多立即下載體驗

一格照片,一個故事,Follow蘋果Instagram!
BannerBanner