李八方online︱一日一《蘋果》 肥佬黎六四前睇少咗

更新時間 (HKT): 2021.06.03 21:32
肥佬黎一直都係按規矩、程序訂閱《蘋果》,但周四卻無故收唔到報紙。

在囚者要接收牆外資訊,渠道本來就少之又少,如果係單獨囚禁,就可能連睇電視睇新聞嘅選擇都冇,只可以單靠睇報紙獲取資訊。在六四前夕,唔少牆內人自然想留意關於六四悼念嘅新聞,不過八方就聽聞,周四(3日)監房派發訂閱報紙時,壹傳媒創辦人黎智英唔知點解收唔到《蘋果日報》。

喺監獄訂報,一向都要透過懲教署申請,根據懲教規定,所有在囚人士都可申請每日收取一份報紙,根據程序,由親友向有關報章或註冊代理商訂閱報紙。同其他在囚人士一樣,肥佬黎一直都係按規矩、程序申請,喺獄中透過睇《蘋果》了解社會資訊,多個月以來派報都無問題。但周四卻發生「意外」,佢唔知點解收唔到《蘋果》,佢嘅家人就向代為訂報嘅報檔查詢,對方話可能係遺漏咗,但其他在囚人士訂嘅《蘋果》又冇漏。

據講肥佬黎家人向福利官提出,周五派報時,可唔可以補返前一日漏派嘅報紙?不過對方話冇補派。八方亦有向懲教署查詢,獲回覆稱如在囚人士對報紙供應商有任何意見,可透過院所管方反映,或直接向代理商提出。其實即使係舊報紙,對在囚者嚟講,都係好寶貴牆外資訊來源,一視同仁嘅權利,唔應該被剝奪。

-----------------------------

蘋果App大升級 更簡潔更就手!了解更多立即下載體驗

一格照片,一個故事,Follow蘋果Instagram!
BannerBanner