隔牆有耳:同志驕傲月 
史墨客同老公恩愛郊遊遊(李八方)

更新時間 (HKT): 2021.06.03 02:00
■史墨客(左)同老公Eric一齊坐纜車,仲品嚐煎餃、湯餃等美食。fb圖片

美國駐港總領事史墨客嚟咗香港之後都比較低調,冇好似佢前兩任唐偉康同夏千福咁,不時將落區相放上總領事館嘅社交網,不過史墨客間中都會貼吓出遊相,好似噚日佢就貼咗去大嶼山嘅相,仲連佢老公呂英宗Eric都有出現。

美領館首掛彩虹旗

前排天氣放晴,真係郊遊好時機,所以史墨客都把握時間周圍行下,今次仲罕有地po咗佢同Eric喺大嶼山坐纜車嘅合照。史墨客喺fb話,佢同Eric喺最近假期去咗好多香港景點,試過好多傳統地道美食,最難忘就係坐纜車,因為睇到好多靚景色。

睇番啲相,佢哋坐纜車嗰日真係好好天,青山綠水,藍天白雲;試過嘅嘢食主要係餃子、煎餃、湯餃。

其實史墨客同以往總領事一樣,都好關注香港自由同人權,好似前日為咗紀念同志驕傲月,美領館就有史以嚟首次喺領事館嘅旗杆掛彩虹旗,本身係同志嘅史墨客仲同一眾人員戴晒彩虹口罩,拎住彩虹旗喺領事館門口大合照,帖文話社會多元化令到唔同地方更加充滿活力、強大和繁榮,仲話美領館全力支持香港同澳門所有LGBTQI+嘅社群,又祝大家同志驕傲月快樂。

李八方

一格照片,一個故事,Follow蘋果Instagram!
BannerBanner