李八方online︱《十八樓C座》講六四 周記明閂門 周老闆倡「鏟平維園起樓」諷政權

更新時間 (HKT): 2021.06.03 17:11

喺六四32周年前夕,商台長壽節目《十八樓C座》今日播出有關「今年六四冇晚會」嘅廣播劇,以嬉笑怒罵交代有關支聯會同六四嘅新聞,呼籲港人要用平常心去面對,努力生活落去!

短短20分鐘嘅廣播劇,由周老闆話聽日「周記茶餐廳」要閂門,唔想惹埋啲「無謂」嘢講起。原來佢擔心聽日會「踩紅線」,仲3次強調今年維園無六四燭光集會,警方會嚴陣以待,甚至可能會用限聚令同《公安條例》拉啲着黑衫嘅人。佢仲話香港人好矛盾,一到六四就會好關心中國,又叫人聽日唔好「以身試法」。

政權咁驚港人去維園悼念,周老闆建議政府手起刀落,索性將成個維園鏟平,咁就唔使再擔心有人喺維園集會,又可以拎嚟起屋,解決房屋問題,順便叫前特首梁振英收聲。

廣播劇亦交代晒近日有關六四同支聯會嘅事,包括啲局長同建制派唔承認當年有份支持八九民運。而去到最後,心地善良嘅冇牙三姑就話,香港人「不想回憶,未敢忘記」,即使冇咗維園燭光,啲人都唔會忘記六四歷史,因「記憶係抹唔走㗎嘛!」佢亦鼓勵大家,「無論點都好,我哋都要用平常心去面對,努力生活落去!」

-----------------------------

蘋果App大升級 更簡潔更就手!了解更多立即下載體驗

一格照片,一個故事,Follow蘋果Instagram!
BannerBanner