六四32︱黃店食肆關燈點燭光悼念 負責人:以前係好普通嘅事

更新時間 (HKT): 2021.06.04 22:58

「祈求民主與自由,萬世都不朽,我願榮光歸香港。」在快將變為禁語的六月四日,灣仔天樂里的開餐Dine Inn響起大家毫不陌生的《願榮光歸香港》。政權嚴厲打壓一切異見聲音,更令人感受到歷史的重量,以自己的方式守護真相。

當政權連過往被嘲為「行禮如儀」的六四集會亦再容不下,當世界變得越發黑暗,不少人會問,到底我們還能做甚麼?黃店食肆開餐Dine Inn的全部分店,選擇在六四的晚上關燈,在食客的桌上放上蠟燭。

位於灣仔天樂里的分店,晚上約6時20分起關燈,點起食客桌上的燭光,負責人Eddy指,是要作「一個歷史的傳承」。

負責人冀以燭光傳承歷史

Eddy指,香港回歸後,人民的自由一直在萎縮,坦言如今單純是發聲、表態,意義亦已變得不一樣,「以往我哋悼念六四嘅集會,係大家覺得好普通,然後有人會希望六四集會應該升級,唔應該繼續好似行禮如儀咁做,但你睇返今日,你真係連舉支蠟燭都可能會俾人拉嘅時候,能夠發聲表態已經係一個好重要嘅意義」。

《國安法》實行後的首個六四,Eddy未有如往年般為六四英魂默哀,但仍堅持以行動去紀念:「佢逼一步,我哋咪退一步囉,但係就唔好話佢唔畀你做一樣嘢,你就即刻乜嘢都唔做,好驚,然後自己退十步。」

令Eddy如斯堅持的,是歷史加諸於他肩上的重量,而在歷史被扭曲的年代,傳承真相的意義更重大:「明白大家嘅傷痛,所有為民主付出嘅人,都希望唔會冇咗呢段歷史……一定要將所有嘢繼續傳承落去,令到後面嘅人會知道究竟當年發生咩事。」

「啲人唔出聲,唔係等於啲人唔記得」

57歲的MY小姐,是當年親眼從電視上看到天安門直播的一代人,回想起當日的畫面,她形容是「震撼」,於是當年出席了維園的燭光集會,日後因為忙碌等原因,沒有再出席維園集會,去年因臨時有事而無法出席維園集會,如今想起,政權步步進逼下,去年的集會或已成絕唱,她坦言無法出席是一種遺憾。

今日穿着黑衣,她笑言「阿一哥提我㗎嘛,我好聽佢講㗎,我睇完佢提我,呀,真係要咁着喇」。直言沒有甚麼原因,「就係覺得要咁樣做」。

與年輕一代講述六四的一段歷史,是因為政權試圖抹走這段血腥的歷史,「呢件事係真係有發生吖嘛,而且最重要嘅係,在權嘅人唔畀人講嘛,你唔畀講咪更加要講」,指六四事件在屠殺「自己人」,「你仲覺得係理所當然」。

警方頻頻以不同說辭竄改歷史,手法與當年的中共如出一轍,她反問:「抹得走咩?30年前嘅嘢,抹咗32年啦,都抹唔甩,呢啲(7.21、8.31)抹得甩咩?」

她更堅定地指,「啲人唔出聲,唔係等於啲人唔記得」,指香港警察「好紅㗎」,在科技發達的年代,全世界早已知道警方的所作所為,重複指「(歷史)抹唔甩㗎」。

MY相信,歷史將會還所有受苦的人民一個公道,指一切的真相必然有水落石出的一日:「我覺得一定會有(嗰一日),一定會有。」在那天來到前,也許是漫漫長路,她寄語港人毋忘初心。

醫護哽咽憶反修例運動與六四連結

醫護G小姐,第一次接觸六四,是因為中學的中史教師播放六四的紀錄片,她以震撼一詞形容:「點解可以咁對自己國家嘅人?(當時)覺得中國真係一個共產國家之中嘅典範。」

今年首度萌生想要出席六四集會的念頭,全因為反修例運動,她指自己過去相當討厭中國人,對他們有 「走水貨、奶粉、又隨地吐痰」的負面印象,「(但)經歷過對極權嘅嗰種抗爭,跟住再睇返(八九年六四)當日好勇敢嘅嗰啲中國人,就覺得原來中國都有好人,只不過嗰批好人而家已經死晒,或者唔再出聲」。

2019年的這些畫面,與當年六四的北京巿民拚命將傷者送往急救的畫面如此類似,讓她與六四產生連結。她一度哽咽指,「19年好多嘅手足受傷,其實個個人都會即刻衝埋去,first aid又好,喺隔籬打緊嘅手足都好,都會即刻湧埋去開遮呀、first aid急救呀、沖鹽水,我真係認為大家手足之間嘅聯繫,係一個共通點」。

以後也許再也沒有六四集會,但她希望大家銘記所有真實發生過的歷史,時刻記住當時的情緒:「人係好善忘嘅,但係如果呢啲咁大件事嘅,我覺得係必須要記得。如果連你都唔記得嘅話,死咗嘅人佢哋就真係犧牲得好無辜」。

不想下一代在被扭曲的歷史下長大

她指自己永遠不會忘記第一次吸入催淚彈的感覺,要永遠記住抗爭的時刻,因為自己是香港人,且不想下一代在被扭曲的歷史下長大。香港環境每況愈下,她原本有移民的想法,但是反修例運動反而讓她做好留下來的準備:「我從來都唔發覺我係咁愛香港,即係我愛香港係因為我愛香港人囉,我想同香港人一齊留喺度。」

「追求民主嘅心,永遠都唔會停止」

今年六四維園集會被禁,但人心若不死,燭光在各處亦能亮起,這是未敢遺忘的他們,度過六四32周年的方式。「歷史可以被磨滅,人可以被禁聲,但人嚮往自由、追求民主嘅心,永遠都唔會停止」。不願上鏡的女士指,這是她堅定的信仰。

-----------------------------

蘋果App大升級 更簡潔更就手!了解更多立即下載體驗

一格照片,一個故事,Follow蘋果Instagram!
BannerBanner