隔牆有耳:《十八樓C座》勉港人平常心努力生活 
周老闆倡鏟平維園起屋 #曲(李八方)

更新時間 (HKT): 2021.06.04 02:00
■「周老闆」金剛劇中擔憂「踩紅線」,故今日要拉閘;冇牙三姑就話大家唔會忘記六四歷史。資料圖片

商台長壽節目《十八樓C座》一向緊貼時事,喺六四32周年前夕,節目噚日就播出有關「今年六四冇晚會」嘅廣播劇,以嬉笑怒罵方式講有關支聯會同六四嘅新聞,呼籲港人要用平常心去面對,努力生活落去。

三次強調「今年冇集會」

短短20分鐘嘅廣播劇,由周老闆話聽日(即係今日六四),「周記茶餐廳」要閂門,唔想惹埋啲「無謂嘢」講起,咁究竟係乜「無謂嘢」呢?原來周老闆擔心聽日會「踩紅線」,仲三次強調「今年維園冇六四燭光集會」,警方會嚴陣以待,甚至可能會用限聚令同《公安條例》拉啲着黑衫嘅人。佢仲話香港人好矛盾,一到六四就會好關心中國,又叫人聽日唔好「以身試法」,不過八方聽落周老闆嘅建議,似乎另有所指喎!

政權咁驚港人去維園悼念,周老闆建議政府手起刀落,索性將成個維園鏟平,咁就唔使再擔心有人喺維園集會,又可以拎嚟起屋,解決房屋問題,仲可以順便叫成日話政府房屋政策唔掂嘅前特首梁振英收聲。

廣播劇仲交代晒近日有關六四同支聯會嘅事,包括啲局長同建制派唔承認當年有份支持八九民運。去到最後,心地善良嘅冇牙三姑就話,香港人「不想回憶,未敢忘記」,即使冇咗維園燭光,啲人都唔會忘記六四歷史,因「記憶係抹唔走㗎嘛!」佢亦鼓勵大家,「無論點都好,我哋都要用平常心去面對,努力生活落去。」

李八方

一格照片,一個故事,Follow蘋果Instagram!
BannerBanner