維園解封 標語被遮 
長者堅信自由會開花

更新時間 (HKT): 2021.06.06 02:00

【本報訊】六四翌日,警方收起所謂的「七千警力」,昨晨的維園,只有零星警員及特務警察來回巡邏。昨日被圍封的範圍已全數解封,市民重獲自由進出維園做運動。不過現場仍遺留人們前一晚「犯禁」前來悼念六四的痕迹,欄杆上綁着白色絲帶,地面亦有已熄滅的蠟燭。

警方前日首次引用《公安條例》封閉維園中央草坪、足球場及籃球場等範圍,至昨日凌晨1時才解封。前日有人在維園一幅牆上噴寫「不要讓64成為禁詞」及貼上「六四甚麼也沒發生」字句,昨日已被黑布遮上。

市民:冇維園嘅六四更有力

對於政權打壓六四維園燭光集會,一名昨晨在維園的老人家說:「悼念、紀念,乜都好,只要仍然有肯記得(六四)嘅人,我信就算有朝一日,維園真係變做中國嘅百年紀念公園、習近平紀念公園都好,唔再向外開放都好,仍然會遍地(開花)嘅。(遍地開花嘅概念)最早其實係《自由花》,歌詞話,但有一個夢,不會死,記着吧,無論雨怎麼打,自由仍是會開花。」

他續說:「我希望我們不會忘記,唔只係一個口號,唔止八九六四,其實一直以嚟嘅每一個傷口,凌杰、彥霖、梓樂,仲有更多可能嗌唔出名嘅,唔係死因庭過咗就算,咁痛(苦嘅回憶)我哋係真係唔會忘記。」

一名中年女士與友人經過維園,談起被禁的六四集會:「我諗香港已經唔再需要靠燭光去提醒人六四嘅存在,冇維園集會嘅六四,以前六四睇電視嘅情緒反而變到好清晰、好鮮明,似乎比唱歌同喊晒口嘅台上發言仲有力。」

一格照片,一個故事,Follow蘋果Instagram!
BannerBanner