隔牆有耳:「小彤群抽會」粉絲力撐 
彤彤羈留室苦中作樂(李八方)

更新時間 (HKT): 2021.06.07 02:00

手機用戶請按此放大圖表

支聯會副主席鄒幸彤被以言入罪,六四當日朝早被捕,話佢宣傳未經批准集結,政權係咪想阻止人去維園燃點燭光悼念,香港人心中有數,鄒幸彤嘅堅持亦為佢贏到唔少掌聲同支持。八方發現,仲有人喺facebook成立咗「鄒幸彤後援會」專頁㖭。

毛氈鋪凳 笑言五星級享受

八方睇返資料,專頁今年5月中成立,本來叫「鄒彤彤後援會」,到六四當日改名叫「鄒幸彤後援會」,噚晚已經有近千人讚好,仲有過千人追蹤㖭呀。

鄒幸彤前日獲保釋後喺警署外見傳媒時,一度拎住一個「彤彤會戰勝歸來」紙牌,唔通就係後援會嘅傑作?眾所周知,姜濤粉絲叫「姜糖」,咁鄒幸彤粉絲應該叫咩名先?有人提出叫彤粉、彤兒,甚至有建議成立「小彤群抽會」。

鄒幸彤噚日喺facebook出文叫大家唔使擔心,佢亦好善用由扣留警署時間,寫咗篇長文再投稿傳媒,話自己喺羈留室失去自由時,體會到快樂可以好簡單,因為有三張毛氈,一張鋪凳,一張摺起當枕頭,一張要嚟冚被,令佢喺硬邦邦嘅長凳上可以瞓得舒舒服服,築起快樂小天地,仲笑言係五星級享受。鄒幸彤心理質素咁高,難怪玻璃心政權驚驚啦!

李八方

一格照片,一個故事,Follow蘋果Instagram!
BannerBanner