隔牆有耳:白鴿籌款達標 袁海文:藍絲都捐錢作反(李八方)

更新時間 (HKT): 2021.06.08 02:00
袁海文

民主黨面對10多年以來最嚴重嘅財赤、再加上大班前立法會議員因初選案被拘捕關押,今年由4月7日至今個月1日嘅「2021籌款獎券」,對民主黨可謂十分重要。該黨籌款委主席袁海文噚日同八方講,今年籌款情況十分理想,只用咗一個月就達到最少籌400萬元嘅目標,佢又話大部份巿民捐款時候,都叫民主黨唔好選立法會,不過最令佢意外係,竟然有自稱「藍絲」嘅市民,都頂唔順個政府,走去捐款畀佢哋。

袁海文噚日同八方講,由於目前仍要核數,故暫時未有具體籌款數字,但承認好多巿民同情佢哋遭到政府強力打壓,捐款反應較以往理想。

較多捐款者撐唔參選

袁估計今次籌款加埋之前賣樓所得約1,000萬元,可令民主黨至少用到明年底,但前提係個黨嘅資產冇俾政府凍結。

袁又話,好多捐款嘅巿民同佢哋講,民主黨唔好派人參選來屆立法會,又話叫佢哋選嘅人唔係冇,都叫有少少,但真係唔多,同叫佢哋唔選嘅人數係有好明顯嘅分別,佢認為係反映港人對政府「完善」後嘅政制失望和不滿。最令佢意外嘅係,竟然有啲自稱「藍絲」嘅市民,都主動捐錢畀佢哋,因為頂唔順𠵱家嘅政府太容納唔到唔同意見!睇到個政府民望咁低,有「藍絲」捐錢畀民主黨完全唔奇。

李八方

一格照片,一個故事,Follow蘋果Instagram!
BannerBanner