李八方online︱紫荊黨IG上載「澳門線上賭場」改圖稱要「Hi翻天」 網民唔受落反斥扮親民

更新時間 (HKT): 2021.06.09 21:14

去年橫空出世、由海歸派工商界牽頭嘅「紫荊黨」,噚日用咗一幅疑似改圖,宣佈「香港首個貼地黨政上線啦」後,今日即時透過Instagram同網民積極互動,回應大部份留言。當中有網民留言問到,該黨噚日呢個宣傳,同澳門首家線上最大賭場有乜關係時,紫荊黨呢位小編就答:「一樣都係想大家Hi翻天」,睇落對呢個網上廣告相當熟悉。對於有網民話,睇完佢哋噚日呢幅改圖後「尷尬」,呢位小編更明寸大台,留言話:「你估我哋係CCTVB咩」,唔通想抄ERROR成員193嘅成功秘訣?

紫荊黨噚日宣佈要塑造一個香港「最貼地、互動性最高、緊貼年青人」嘅政黨後,今日即時示範點樣喺IG同網民互動。對於有傳該黨嘅出現,意味民建聯等建制派可以「收皮」,該黨小編今日予以否認,並話:「嗱嗱嗱!我冇咁講過啊。」

唔少網民就留言,質疑該黨只係想扮嘢親近年青人,實質係想「奶共」,該黨小編就先以「巴打」、「Ching」、「手足」稱呼對方,再呼籲大家唔好先入為主,希望大家畀次機會,仲話「冤有頭債有主,你啲指責真係唔關我哋事,建制同政府造成點大家心照」。

對於有網民質疑,該黨喺冇着數下,唔使諗有人會投票支持,該小編就答:「所以咪準備搞高級蛇齋餅糭囉」,唔知佢哋怕唔怕俾廉署請去飲咖啡?

紫荊黨今晚就正式啟動佢哋個「高級蛇齋餅粽」活動,話由於梁振英呢排「好似蠢蠢欲動有搞作」,叫網民估吓梁振英究竟會唔會參選明年特首選舉,仲話只要梁振英一旦發表有關選舉言論(不論參選與否),該黨都會送出689份禮物,畀回答正確嘅網民,禮物包括PS5、iMac、Switch、iPad Pro等電子產品同現金卷(券)喎。

-----------------------------

蘋果App大升級 更簡潔更就手!了解更多立即下載體驗

一格照片,一個故事,Follow蘋果Instagram!
BannerBanner