隔牆有耳:聞多元運動會 何君堯恐同跳掣(李八方)

更新時間 (HKT): 2021.06.10 02:00
■何君堯喺會上激動反對同樂運動會,理由九唔搭八。

香港四年前成功取得2022年同樂運動會(Gay Games)主辦權,畀唔同性取向、身體狀況、性別、種族嘅人都可以參與賽事。新民黨葉劉淑儀噚日喺立法會提出質詢,話同樂運動會預計為香港帶嚟10億經濟收益,叫政府諗吓提供協助,點知唔問由自可,一問就引嚟一班恐同建制派議員跳晒掣,何君堯反應最激,話啲經濟收益係「污糟錢」,要唔要都罷!

話10億收益係「污糟錢」

何君堯反對同志權益係人都知,佢反對舉行同樂運動會亦唔意外,但理由真係好難明,例如話「你喺房搞咩係你嘅事,但喺大庭廣眾係有失體面」,運動會又同佢講嘅有乜關係?之後仲越拉越遠,擔心舉辦完運動會後下一步會學台灣爭取同性婚姻合法化,話唔想賺呢啲「污糟錢」,10億經濟收益要唔要都罷。

同樣反對同性婚姻嘅經民聯梁美芬冇咁離題萬丈,佢話性傾向問題有可能撕裂社會,質疑政府新聞處、旅發局、投資推廣署高調支持活動,要求政府中立,撤回對活動嘅支持。

葉劉反駁活動只係彰顯香港支持平等機會,唔係推動同性婚姻,又話其他議員過度激動。民政事務局局長徐英偉話,民政局只係從體育角度看待同樂運動會,又強調局方未有政策及基金支持活動。

李八方

一格照片,一個故事,Follow蘋果Instagram!
BannerBanner