鄒幸彤被捕1周 再因去年六四集結案上庭 堅拒認罪:悼念何罪之有?

更新時間 (HKT): 2021.06.11 19:11

被指涉違反《公安條例》被捕獲釋後一星期,支聯會副主席鄒幸彤今日又要就去年六四在維園被控非法集結上庭,她昨接受《蘋果》訪問表示不認同悼念六四有罪,故絕不會選擇認罪:「我拒絕承認呢種以法律為名嘅政治打壓,唔應該由法庭去審判悼念六四嘅燭光。」她又感謝市民在六四晚上克服恐懼堅持上街,勇敢舉起手上燭光,讓她感動又鼓舞。

六四早上被警方以「涉宣傳及公佈未經批准集結」拘捕並扣留超過33小時,本身是大律師的鄒幸彤獲准以1萬元保釋,但仍須於7月5日再報到。獲釋後馬不停蹄,連日處理積壓的律師樓工作,小妮子笑說除了離開警署後回家洗澡更衣,獲釋與上庭間的自由日子,大部份時間都留在位於中環的律師樓工作:「起碼慳到來回坐車時間……夜晚多數都係瞓會議室,以前瞓瑜伽蓆,朋友唔抵得,就買咗張吹氣地蓆畀我,依家啲蓆好先進,唔使用口吹,好方便……」

對物質生活無大要求,又長久習慣撥開會議室的辦公椅「瞓地下」,無怪小妮子獲釋後在社交媒體報平安時,就說自己在羈留所「食好躺好」、「想睡就睡」。大抵,在逆境中尋快樂,是她的強項,只是當權者以言入罪,日前又拘捕還押被指「播獨」的派傳單人士,步步進逼,言論自由進一步收窄,留下來的香港人又應如何自處?有甚麼仍然可以做?

「今年傳承六四 係實牙實齒有重量」

「當權者打壓嘅力度越嚟越強,但大家仍然有好多嘢可以做,揸的士嘅可以擺一啲標語鼓勵吓同路人;做老師嘅,可以講多啲公平正義嘅嘢;啱啱法律界先做咗一個資料庫,記錄佔中以來相關的判例……仲未計嗰啲好多人已經做緊嘅在囚支援,旁聽師送車師……」客觀評估政治現實後選擇積極面對,鄒直言見到很多香港人仍然在堅持,覺得很鼓舞。

「正如今年六四,仍然見到好多人肯走上街頭反抗政權不合理嘅限制,見到香港人仍然有戰意未投降,呢樣嘢係一定要係被看見,咁樣先可以支持大家繼續向前行。」《國安法》下,鄒幸彤形容今年六四是關鍵的一年,支聯會一直講傳承,於她而言,這兩個字今年意義特別重大:「今年嘅傳承,係實牙實齒有重量,因為後果不能同日而語,會問自己係咪喺安全嘅情況之下先去追求原則,定係喺風險之下仍然堅持,呢個係好實在嘅考驗。」

「就算攞住蠟燭喺度震 仍然行出嚟」

對於在政治高壓下,很多香港人仍選擇繼續站出來,她説香港人超乎想像,好堅:「我覺得大家開始學習到點樣克服恐懼,好現實咁講,呢個狀態係會好長久,因為《國安法》唔會突然消失,我哋未來嘅日子,一樣會活在有把刀喺自己頭上嘅恐懼,而點樣同呢種恐懼共存,而喺恐懼下繼續行動,係我哋今後要學習嘅課題,今次六四集會,係一個好好學習嘅機會,就算攞住支蠟燭喺度震,但我哋仍然選擇行出嚟,呢個係新時代下繼續抗爭要學習嘅事。」

都說六四夜禁絕燭光的維園,與天安門廣場正式接軌,鄒表示從另一角度看,是真正體現中港命運相連的政治現實:「以前覺得係切割又好中國嘅嘢唔關我事又好,未打到埋身未有好強硬嘅措施,到你打到埋身,先發覺原來大家係打緊同一場仗。」她指當權者肯定想見到香港在六四悼念上,與內地一樣趨向地下化,「每個香港人都應該努力爭取發聲嘅空間,六四真係做得好好,啱啱過咗6.9,希望香港人繼續用行動克服恐懼。」堅守信念就無所懼,未因被補被控而噤聲,鄒幸彤笑說從來很自由。

記者 呂麗嬋

-----------------------------

蘋果App大升級 更簡潔更就手!了解更多立即下載體驗

一格照片,一個故事,Follow蘋果Instagram!
BannerBanner