隔牆有耳:何柱國眼眨眨扮777
「我似唔似佢呀?」(李八方)

更新時間 (HKT): 2021.06.11 02:00

近期政壇花生主角一定係政協常委何柱國,事關佢日前喺商台狠批特首林鄭月娥,話警告過林鄭修訂《逃犯條例》會招致美國制裁香港,仲鬧佢自把自為令香港受制裁。不過,一向敢言嘅何柱國忽然收口,昨日出席一個發佈會被傳媒追問時,十問九唔應,重複話「冇嘢講」,只顧扮林鄭「眨眼」。

一向高調論政嘅何柱國噚日就疑似「噤聲」,不斷重複話自己冇嘢講,又喺度扮特首林鄭眨眼,仲同記者講「你隻眼要眨多啲先得,『射哩眼』要眨多啲」、「我眼眨得夠唔夠?似唔似佢呀?」

自封領呔KOL

何柱國似乎刻意唔再回應記者問題。記者再追問何覺唔覺得特首林鄭有虛心聽佢意見,何柱國答佢自己就「虛心聽緊記者意見」。至於林鄭施政上有乜要改善?何柱國就話自己每日都改善緊,仲同記者講「唔好搞喇,你玩唔過我㗎喇」。

特首選戰開跑,林鄭早前話前特首梁振英早前被話係「KOL」(意見領袖),唔會評論佢講嘅嘢。何柱國就話唔知乜叫「KOL」,但自己就係「領呔KOL」,又話唔會答梁振英想做特首嘅事,「你自己問佢啦,唔好問我啦,我唔會答呢啲」。

今年3月嗰陣,何柱國話如果林鄭月娥出嚟再選特首就一定出嚟,目的就係想搵個機會同佢辯論。咁佢𠵱家仲想唔想參選?何柱國話遲啲再答,不過就話會支持所有居住滿7年、拎香港身份證嘅市民參選特首,「你哋去,我就陪你哋(參選)。」

另一方面,有《蘋果》讀者噚日下晝5點幾喺觀塘安泰邨恒泰樓,野生捕獲到近日被各路人馬圍攻嘅林鄭月娥。由於呢條邨係安達臣道發展計劃一部份,所以呢位讀者估計林鄭去嗰度,可能同土地發展問題有關,唔排除佢係想諗計反擊最近經常就房屋問題狙擊佢嘅一班梁粉同689喎。

李八方

一格照片,一個故事,Follow蘋果Instagram!
BannerBanner