› 選擇地區
三藩市
紐約
洛杉磯
其他美國地區
香港 台灣 北美
 
2009年08月10日

隔牆有耳:李少光新抱陀B贏選美 - 李八方

名人或者高官通常有樣嘢好避忌,就係屋企人突然遇到一啲事,講到大家都知道,自己反而最後、甚致睇新聞先知。今次涉及嘅高官係保安局局長李少光,佢新抱靜靜雞報名參加最靚孕婦選舉,結果艷壓群「媽」,贏得「靚媽咪大獎」,仲贏埋個全場亞軍,雖然靚太唔易做,但難唔又等於做唔到。
李少光個仔李霖恩(Glen)嘅愛妻方燕凌,噚日陀住個8個月嘅肚現身灣仔會展,參加第七屆全港最靚孕媽媽選舉。15個參賽者,其中一位個胎作動退出外,大部份腹大便便嘅靚媽咪,個個都悉心打扮出賽。惟獨24歲、任職護士嘅4號仔方燕凌,着件紅白橫間Tee配牛仔褲。靚太除咗要講樣,仲考埋懷孕時點樣食得健康、點樣開奶餵BB、仲要考對BB用品嘅認識。

老公瞞老婆報名參賽

八方記得佢哋舊年2月拉埋天窗嗰陣,老爺李少光對新抱讚不絕口「畀足100分」,至於抱孫題就「順其自然」。諗唔到,光陰飛逝,老爺今年10月再榮升阿爺。經過一輪比試,結果方燕凌除咗贏得靚媽咪大獎,仲贏埋全場亞軍。
做過無綫電視藝員嘅Glen,性格完全唔似做局長嘅老竇,成日板起塊臉。靚老婆得獎後,唔知幾咁開心,好風趣咁見招拆招,任由記者提問,唔似得李少光見記者,講完幾句就掉頭走人。
Glen話,老婆有喜之後,成日話自己肥咗仲醜樣咗好多,於是偷偷哋同老婆報名參選全港最靚孕媽媽,等老婆提高自信心。今次神秘報名,連老竇李少光亦唔知情。八方問佢,個孫就嚟出世,李少光有冇嚟探吓佢地。Glen笑笑口咁話,「梗係有喇,個孫嚟o架﹗」方燕凌話,雙方父母都好關心佢同BB。每次檢查都幾大陣仗,全家出齊。
Glen話,最初仲以為個比賽淨夠靚就得,點知要考埋即場反應,諗住老婆會輸梗,到後來贏到全場亞軍真係好僥倖。贏咗個「靚媽咪大獎」,獎品係佢哋最想得嘅,就係BB出世後會保留18年嘅臍帶血,真係慳番好多錢。唔怪得Glen,噚日聽見個老婆贏得呢個獎,即時開心到彈起。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載