所謂贏到就唔係盲門，悶局同數據都係攞嚟破嘅！
今晚（14日）情人節谷中跑送歲馬，賽前就快四個月冇贏馬的練馬師賀賢，終於打破頭馬荒，佢在第四場四班1200米以徒弟潘明輝勝出落飛馬「英姿茂盛」，單Win及組合獨贏A2分別派67.5及25.5元。
賀賢錄得個人自舊年10月25日在谷中贏出「開心健康」以來，近三個半月內首場勝利，可謂苦盡甘來。不過賀賢贏完「英姿茂盛」亦只得6Win包尾，尚欠10場之多才達標。
無巧不成話，「開心健康」當晚贏谷草四班一哩，亦係由潘明輝經手，今場潘明輝發揮「英姿茂盛」亦可謂恰如其份，藉只負118磅及排5檔起步順勢而出，之後貼住內欄一放到底，贏0.75馬位，走勢清脆俐落。
賀賢表示以往在澳洲從練，從阿德萊德搬去墨爾本初時，試過三個月沒有頭馬，今次是在港從練第一次超過三個月沒有頭馬，當然有壓力，說不緊張就呃人，不過自問旗下馬多次有獎金收，多次跑第二及跑第三是短距離被擊敗。
賀賢指整體馬匹沒有做錯，只是欠點運氣，希望「英姿茂盛」取勝後，日後可多些贏馬，出擊手風轉順。賀賢又表示如果過去三個月手風順一點，可贏出六至七Win，甚至十場頭馬。
「英姿茂盛」上次跑泥地1200米亦放頭，最終有前冇後輸11.25馬位包尾，今場移師谷中卻由蟲變龍，從而打破本身季內齋缽，表現其實幾飄忽。
第四場二至四名順序為「大四喜」、「真心意」及「八心之友」，四重彩派二萬一千幾。
