【賢仔Call馬】九歲老馬近績可靠!鄭俊偉行「大運」(廖浩賢)

更新時間 (HKT): 2020.01.14 20:15
大運舞台老而彌堅

明晚(15日)快活谷跑九場賽事,安排在C加3跑道上演。

騎師方面,潘頓及史卓豐停賽,焦點自然落在雷神及田泰安身上。

練馬師方面,近期華人表現出色,就連榜末的鄭俊偉,上周六(11日)亦成功起孖爭一口氣。

明晚鄭廐出馬六匹,普遍都有好狀態支持。其中,第二場「大運舞台」九歲老黃忠近績可靠,值得留意。

第二場四班1200米:低水準四班短途賽,馬膽揀「大運舞台」。上季在葉廐贏三場以為揸乾用盡,今季鄭俊偉接手,一心諗住要落五班才吼。

季初連輸四仗,前仗同程後追輸個半馬位已經有復蘇走勢。

上仗田草1200米再排10檔,直路與「量化歡騰」同步發力,一中一外蝕位較多下,只輸半馬位跑第三,以一匹九歲老馬表現計,戰鬥力確認未盡退化。

難得復課快跳身型毛色更勝上回合,馬房保養工夫確值得一讚,抽5檔進可攻退可守,乃坐二望一之選。

「大聚會」隔七日匆匆再出,上仗全程塞車當無跑過,拼後第二日已經在機場踱步,排位朝還有最後試跑,以高伯新馬房來講算係絕無僅有。

「勇冠多」抽1檔賺形勢。「隨我來」上次千軍萬馬中突圍,其實難度相當高。

第三場四班1000米:同樣係弱組賽事,「紅鬃烈馬」初出強配雷神必定最矚目,馬仔細細前速夠快,在外地試閘一放到底,在港試閘表現亦理想。

但有一個問題係最後一課谷草閘,直路出頭後仍會閃出閃入,即是話成熟程度未夠,能否初出即監生吞?稍為有所保留。

「如真如假」反而實實在在,陣上跑過有好演出,而且狀態肯定好,用希威森會因人而冷,有贏過馬嘅1200米唔報,選擇縮程跑1000米,方嘉柏部署總有其原因。

「超額認購」前仗同程排11檔,沿途包尾後追輸兩個半身位,走勢已經引人,上次田草1200米不留而放,捱到最後100米才腳軟,試前試後回師谷草最短途,有權殺出重圍。

「開心好友」近況穩定,用蘇兆輝當然想打硬仗,可惜排11檔打折扣。

一格照片,一個故事,Follow蘋果Instagram!
BannerBanner