【wONdEr】睇波「維修香港」 土瓜灣世盃社區放映

更新時間 (HKT): 2018.06.23 14:00

六月的香港被世界盃熱潮淹沒,唐樓林立的土瓜灣鴻福街亦不能幸免。幾個大男人爬上木長梯,掛上色彩斑斕的萬國小旗,頓時為殘破的老街、舊區添上盛事氣氛。原本一直專注為市民義務維修家具的傘後組織「維修香港」,由月中開始,不定期在鴻福街的公共空間搞世界盃社區放映,創造空間讓區內居民聚首。與過往截然不同工作,其實都為同一初衷 - 「凝聚人心」。

一五年成立的「維修香港」,多年來每星期都搞社區探訪隊,到土瓜灣的舊樓挨家挨戶探望居民,義務維修家具和電器。「我哋希望透過免費做維修,將社會議題帶去普通街坊度,希望佢哋都可以關注,從而組織街坊嘅力量。」義工阿森說。

今次搞世界盃社區放映,亦是緊貼「維修香港」的宗旨。

本身是多年球迷的阿森,對於足球所帶來的力量感受很深:「仲好記得零九年東亞運決賽,陳肇麒頂入咗打和一球,嗰球好激奮人心…… 放到去社區都一樣有效果。好神奇架,原來唔識嘅街坊,因為睇波,有傾有講、一齊飲嘢,對於一個社區幾重要。」土瓜灣舊區一帶的居民十分多元,由劏房戶、新移民、少數族裔以至到難民等等最基層的人,都寄居在其中。是次放映時間因為烏雲密佈,初時屢屢出現訊號接收不良的情況,但最終依然吸引了「各色」街坊觀賞賽事。

沙中線快將駛進土瓜灣,市建局去年又提出以當時最高的收購價每呎近$16,000收購鴻福街、啟明街舊樓,這些巨變嚴重影響當區基層街坊的生活。已年逾六旬的義工wingwing本身亦是當區的劏房戶,因獲「維修香港」幫助而認識他們的工作:「天鴿十號風球,將我屋企條天線打壞,電視直情收唔到台,我向個業主求救,業主又唔肯整,係『維修香港』免費幫我set過一條。」到重建消息被確實,業主變得更不近人情:「未有消息重建時,租金都唔係加得好犀利;但一話重建,佢就加喇,甚至居住戶口凍結後,仲狂加。」

阿森指,面臨巨變之時,他們所做的「人心凝聚」、「社區營造」的工作更顯重要:「以前好多老店,好有人情味,隨著重建都搬走咗。某程度上呢種街坊與街坊之間嘅感情,可能就係咁逐漸、逐漸流失。」同時,在重建、收樓之時,當區租戶亦經常會遇到不公平對待,阿森認為,居民在這時候更需團結起來爭取自身權益:「凝聚街坊係好重要。如果街坊睇世界盃,都係閂埋門自己睇自己,佢哋完全唔理解個社區,個社區有咩事都唔識一齊發聲,係唔得。街坊同街坊本身嘅關係好重要。」

一格照片,一個故事,Follow蘋果Instagram!
BannerBanner